ད་ལྟ་ཁྱེད་ཀྱི་གནས་ཡུལ་ནི། - ཙོང་ཆུའི་དྲ་བ། >> ནང་བསྟན། >> སྔགས་ཀྱི་བཀླག་ཐབས་བསྡུས་པ་ཞེས་བྱ་བ།

སྔགས་ཀྱི་བཀླག་ཐབས་བསྡུས་པ་ཞེས་བྱ་བ།

[རྩོམ་གྱི་ཡོང་ཁུངས། དྲ་རྒྱ་ལས་བཏུས་པ།] [རྩོམ་པ་པོ། སྣར་ཐང་ལོ་ཙཱ་བ།] [ཟླ་ཚེས། 12-06-15] [ཀློག་གྲངས། ]

               ༄༅།། རྒྱ་གར་སྐད་དུ། མནྟ་སྱ་པ་ཐོ་པཱ་ཡ་བི་ཙིནྟ་ནཱ་མ། བོད་སྐད་དུ། སྔགས་ཀྱི་བཀླག་ཐབས་བསྡུས་པ་ཞེས་བྱ་བ། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཚོགས་གཉིས་སྤྲིན་དཀར་འཛུམ་པ་ལས་འོངས་མཚན་དཔེའི་རི་དྭགས་གཟུགས་ཀྱིས་བཀྲ། །ཁྱེད་སྐུ་ཟླ་བ་ཆ་ཤས་ཡོངས་རྫོགས་ཕྲིན་ལས་འོད་དཀར་ཁོར་ཡུག་ཅན། །གང་གིས་མཐོང་ན་སྙིང་མུན་སེལ་བྱེད་གདུལ་བྱའི་མཁར་ཁྱབ་འགྲོས་གཉིས་པ། །དབྱངས་ཅན་ལྷ་མོ་མཚན་མོའི་མགོན་ཁྱོད་དེ་རིང་བདག་བློའི་ཀུ་མུད་སྐྱོངས། ། གསང་སྔགས་ཆོས་ཚུལ་ཟབ་མོའི་གཞལ་ཡས་ཁང་། །བདེ་བར་འཇུག་འདོད་གང་བློའི་བུ་མོ་ལ། །སྒྲ་སྦྱོར་སྔགས་ཀྱི་བརྗོད་ཚུལ་མགུལ་རྒྱན་མཆོག །གནད་ཀྱི་ཕྲེང་བ་དེ་རིང་ཁོ་བོས་སྦྱིན། །དེ་ཡང་འདི་ལྟར་ཡི་གེའི་ངོ་བོ་ནི་གང་། དེ་ཁམས་གང་གིས་བསྡུས་ཤིང་སྐྱེ་བའི་ཚུལ་ནི་གང་། བཀླག་པའི་ཐབས་ནི་ཅི་ཞེ་ན། ངོ་བོ་ཨཱ་ལི་ཀཱ་ལི་སྟེ། །ཕོ་མོ་མ་ནིང་གསུམ་དུ་གནས། །ཨ་ཀུ་ཧ་ྈྐ་ནམ་མཁའི་ཁམས། །
མགྲིན་པའི་གནས་ལས་སྐྱེ་བ་ཡིན། །ཨི་ཙུ་ཡ་ཤ་རླུང་གི་ཁམས། །ལྕེ་རྩེ་སོ་རྐན་དག་ལས་སྐྱེ། །རྀ་ཊུ་ར་ཥ་མེ་ཡི་ཁམས། །སྤྱི་བོ་དག་ལས་སྐྱེ་བ་ཡིན། །ཨུ་པུ་ཝ་ྉྤ་ཆུ་ཡི་ཁམས། །མཆུ་ཡི་གནས་ལས་སྐྱེ་བ་ཡིན། །ལྀ་ཏུ་ལ་ས་ས་ཡི་ཁམས། །ལྕེ་རྩེ་སོ་ལས་སྐྱེ་བ་ཡིན། །འབྱུང་བ་ཆུང་བ་སྡེ་ལྔ་ནི། །ཀ་ཙ་ཊ་ཏ་པ་རྣམས་ས། །ཁ་སོགས་ཆུ་ཡིན་ག་སོགས་མེ། །གྷ་སོགས་རླུང་ཡིན་ང་སོགས་མཁའ། ། ༈ ཨོཾ་དང་ན་མོ་ཏདྱ་ཐཱ། སྤངས་པའི་སྔགས་ཀྱི་ཐོག་མ་དང་། །རང་གི་མིང་ཐོག་གཟུང་བར་བྱ། །གསལ་བྱེད་བརྩེགས་སམ་འཕུལ་བཞག་ཡོད། །དང་པོའི་ཡི་གེ་གཟུང་བར་བྱ། །གསལ་བྱེད་དགྲར་གྱུར་ནད་མང་ཞིང་། །དབྱངས་ཡིག་དགྲར་གྱུར་སྲོག་དང་འབྲལ། ། ཐ་མལ་གྱུར་ན་འབྲས་བུ་མེད། །གྲོགས་སུ་གྱུར་ན་དངོས་གྲུབ་འབྱུང་། །དེ་ཕྱིར་དགྲ་གྲོགས་བརྩི་བ་གཅེས། །
ས་དགྲ་མེ་ཡིན་མེ་དགྲ་ཆུ། །ཆུ་དགྲ་རླུང་ཡིན་རླུང་དགྲ་ས། །ས་ནི་མེ་ལ་ནུས་པ་མེད། །མེ་ནི་ཆུ་ལ་ནུས་པ་མེད། །ཆུ་ནི་རླུང་ལ་ནུས་པ་མེད། །རླུང་ནི་ས་ལ་ནུས་པ་མེད། །ས་ཆུ་ཕན་ཚུན་གྲོགས་པོ་སྟེ། །མེ་རླུང་ཕན་ཚུན་གྲོགས་པོ་ཡིན། །ནམ་མཁའ་ཀུན་གྱི་གྲོགས་ཡིན་ཏེ། །ཀུན་ཀྱང་ནམ་མཁའི་གྲོགས་སུ་འགྱུར། །དེ་ལྟར་དགྲ་དང་གྲོགས་ཤེས་པ། །སྔགས་ཀྱི་ཀློག་ཚུལ་འདི་ལྟ་སྟེ། །ཡི་གེ་ཐུང་བ་གཅིག་ཡུན་བཀླག །རིང་བ་གཉིས་ཀྱི་ཡུན་དུ་བཀླག །ཤིན་ཏུ་རིང་བ་གསུམ་ཡུན་བཀླག །པླུ་ཏ་ཡང་དེ་བཞིན་ནོ། ། ༈ །འབྲེང་བུ་ན་རོ་ཡོད་གྱུར་ན། །རིང་པོ་ཉིད་ཕྱིར་འ་འདོགས་འཁྲུལ། །མིང་གི་ཐོག་མར་སྡེ་པ་ཡི། །གསུམ་པ་འས་ཕུལ་བཞིན་དུ་བཀླག །དབུས་མཐར་བྱུང་ན་བོད་དང་མཚུངས། །བཞི་པ་རྣམས་ནི་གསུམ་པ་ལ། །ར་མགོ་ཧ་སྒྲ་ལྡན་པར་བཀླག །ཊ་སོགས་ལོགས་སྡེའི་བཀླག་ཚུལ་ནི། །ལྕེ་རྩེ་རྐན་སྦྱར་སྟིབས་ཀྱིས་བསྒྱུར། །ཥ་ནི་ཁ་དང་ཆ་མཐུན་པར། །རྐན་གྱི་ཕུགས་ནས་སྟོངས་ཀྱིས་འདོན། །ཀྵ་ནི་ཁྱ་དང་ཆ་མཐུན་ཙམ། །ཛ་ལ་ཉ་བཏགས་འགྱ་འམ་གཉའ། །གསལ་བྱེད་མི་འདྲ་དུ་མ་བརྩེགས། །རང་སྒྲ་ཐོན་ཙམ་མྱུར་བར་བཀླག །དབྱངས་དང་ང་རོ་འོག་མ་དབང་། ། འདྲ་བའི་གསལ་བྱེད་བརྩེགས་གྱུར་ན། ། ཁ་ཁེངས་མཐོན་པོའི་གདངས་ཀྱིས་བཀླག །བརྩེགས་པའི་ཐོག་མ་གོང་མ་དབང་། །དེ་འོག་རྣམས་ནི་དཀྱུས་སུ་བཀླག །ཉ་ཎ་ཡར་སྦྱར་ན་ལྟར་བཀླག །ཤ་ཥ་ཡར་སྦྱར་ས་ལྟར་བཀླག །ཀ་ནི་ག་དང་ཙ་ཛ་ཊ། །ཌ་ཏ་རྣམས་ནི་ད་རུ་བཀླག །པ་ཡིག་རྣམས་ནི་བ་རུ་བཀླག །གྷ་ཛྷ་ཌྷ་དྷ་བྷ་རྣམས་ནི། །ཡི་གེ་གཉིས་གཉིས་འདོད་པ་འཁྲུལ། །དེ་བཞིན་དབྱངས་ཀྱི་རྀ་ལྀ་གཉིས། །ར་དང་ལ་རུ་འདོད་པ་འཁྲུལ། །རྣམ་བཅད་ས་རུ་བཀླག་པའམ། །དྲག་པོར་བཅད་དེ་བཀླག་པར་བྱ། །རྗེས་སུ་ང་རོ་སྡེ་པ་ལ། ། རང་རང་སྡེ་པའི་ལྔ་པར་བཀླག ། ཡ་སོགས་བརྒྱད་ལ་ང་རུ་བཀླག །ཡང་ན་སྡེ་ལྔའི་ཟླ་ལ་སྦྱར། །ཤད་ཀྱིས་ཆོད་ན་རང་ཉིད་བརྩི། །ཤད་མེད་ན་ནི་འོག་མ་བརྩི། །ཨོཾ་དང་ཧཱུཾ་གཉིས་མ་དང་ང་། །ཚིག་གྲོགས་དག་ལ་བལྟོས་པ་མིན། །ལྕེ་རྩ་ཅན་དང་མཆུ་ཅན་གཉིས། །ཨ་ཀ་ཨ་པ་ཞེས་པའམ། །ཀོ་ཝ་པོ་ཝ་ཞེས་པར་བཀླག །ཡ་བཏགས་ཕལ་ཆེར་འགྲེལ་བུ་ནི། །
ཡའི་སྒྲ་ཅུང་ཟད་ལྡན་པར་བཀླག །ཡ་ལ་ཡ་བཏགས་ཡ་རང་ཉིད། །ཀ་ཁའི་ཡ་བཏགས་བོད་བཞིན་བཀླག །ར་ལ་ཡ་བཏགས་ར་ཡར་བཀླག །ཝ་བཏགས་ཕལ་ཆེར་ན་རོ་སྟེ། །ཝ་སྒྲ་ཅུང་ཞིག་ལྡན་པར་བཀླག །ཀ་སོགས་སྲོག་ཏུ་རྀ་ལྀ་ཞུགས། །གི་གུ་ཕྱིར་ནི་ལོག་གྱུར་ན། །ཀི་རྀ་ཀི་ལྀ་ཞེས་མྱུར་བཀླག །ཀ་སོགས་ར་དང་ལ་བཏགས་ནས། །གི་གུ་ཕྱི་ནི་མ་ལོག་ན། །ཀ་རི་ཀ་ལི་ཞེས་པར་བཀླག །ཨཻ་དང་ཨཽ་ཡི་བཀླག་ཚུལ་ནི། །ཨེ་ཨི་ཨོ་ཨུ་ཞེས་པར་བཀླག །དེ་བཞིན་ཀ་སོགས་སྲོག་ཞུགས་ན། །ཀེ་ཨི་ཀོ་ཨུ་སོགས་སུ་བཀླག །རྒྱས་པར་སློབ་དཔོན་ངག་ལས་སློབས། །མདོར་བསྡུས་ཙམ་འདི་སྐད་གཉིས་པ། །སྣར་ཐང་ལོ་ཙཱ་གང་དེ་ལ། །བཤེས་གཉེས་བློ་གྲོས་དཔལ་འབར་གྱིས། །ཐང་པོ་ཆེ་རུ་བསྐུལ་ནས་སྦྱར། །དེ་ལས་བྱུང་བའི་དགེ་བ་ཡིས། །འགྲོ་རྣམས་སྔགས་དོན་རྣམས་གཟིགས་ཤོག །སྔགས་ཀྱི་ཀློག་ཐབས་ཞེས་བྱ་བ་རྫོགས་སོ།། །།
 

དཔྱད་གཏམ།

དཔྱད་གཏམ་སྤེལ་བ།
པར་དབང་ཡོད་ཚད་ངེད་ཙོང་ཆུའི་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག
Copyright © 2010 Tsongchu.coM All rights reserved. Powered by: Tibetitw.coM
E-mail:[email protected]  QQ:1239685970 QQ:32460212  MSN:[email protected]