ད་ལྟ་ཁྱེད་ཀྱི་གནས་ཡུལ་ནི། - ཙོང་ཆུའི་དྲ་བ། >> རྩོམ་རིག >> དབྱངས་ཅན་མའི་བསྟོད་པ།

དབྱངས་ཅན་མའི་བསྟོད་པ།

[རྩོམ་གྱི་ཡོང་ཁུངས། ངེད་དྲ་བ།] [རྩོམ་པ་པོ། པཎྟི་ཏ་ནག་མོ་ཁོལ།] [ཟླ་ཚེས། 10-05-29] [ཀློག་གྲངས། ]

འཕགས་ཡུལ་གྱི་མཛེས་པའི་དཔེ་སྦྱོར་བ་ལ་མཁས་པར་གྲགས་པའི་སློབ་དཔོན་འདིས་བརྩམས་པའི་སྙན་ངག་ལ་སྤྲིན་གྱི་ཕོ་ཉ་ལ་སོགས་པའི་ཕོ་ཉ་བརྒྱད་དང་། གཞོན་ནུ་འབྱུང་བ་སོགས་ཡོད་པར་གྲགས། སློབ་དཔོན་འདིའི་མཚན་ལ་འདི་འདྲ་བཏགས་པའི་རྒྱུ་མཚན་གཏམ་རྒྱུད་དང་སྦྱར་ཏེ་བཤད་སྲོལ་རྒྱས་ཙམ་ཡོད་མོད་འདིར་མ་བཀོད།།  རྒྱ་གར་སྐད་དུ།  སྰ་ར་ས་ཏྰི་སྟོ་ཏྲ་ནྰ་མ། བོད་སྐད་དུ། ལྷ་མོ་དབྱངས་ཅན་གྱི་བསྟོད་པ་སྟོན་ཟླ་རབ་རྒྱས་ཀུ་མུད་དུང་དང་ཆུ་ཤེལ་གངས་རི་ལྟར་དཀར་བ།། རབ་དཀར་དཀར་གསལ་གཟི་ལྡན་ཡིད་འཕྲོག་ལྷ་མོ་དབྱངས་ཅན་ལ་ཕྱག་འཚལ།། བདག་བློའི་མི་ཤེས་གཏི་མུག་རྨོངས་པའི་ཉེས་ཚོགས་ཀུན་ནས་འཇོམས་པ་དང་།། སྨྲ་ངན་སུན་འབྱིན་ཐོགས་མེད་ཀུན་གཟིགས་སྤོབས་པའི་གཏེར་མཆོག་རྒྱས་པར་མཛོད།། སྒྲིབ་གཉིས་སྤྲིན་བྲལ་བློ་གྲོས་འོད་ཟེར་སྟོང་ལྡན་རབ་ཏུ་འཆར་ཀ་ཡི།། ཉི་མའི་ཟེར་གྱིས་གདུལ་བྱའི་པདྨོ་རབ་དུལ་ཁ་འབྱེད་རྣམ་རྒྱས་པས།། རབ་ཏུ་དྲི་ཞིམ་བསིལ་ངད་དང་ལྡན་པདྨོའི་ཟེའུ་འབྲུའི་ངོས་དག་ལ།། བདག་བློས་གུས་པས་འཐུངས་པས་བློ་གྲོས་ཆེར་རྒྱས་སྦྲང་རྩིས་འགྲོ་རྣམས་སྐྱོང་།། གསེར་གྱི་རི་དང་ཀུན་མཁྱེན་ཆུ་གཏེར་ལྟ་བུར་ཀུན་ནས་ལྷུན་ཆགས་པ།། རྩོད་པའི་ཕྱེ་མ་ལེབ་དང་བདུད་སྡེ་དུས་ཀྱི་རླུང་གི་བསྐྱོད་མ་ཡིན།། བཅུ་དྲུག་ན་ཚོད་ལྟ་བུའི་བུ་མོ་རབ་མཛེས་སྒེག་པའི་ཉམས་དང་ལྡན།། ལྷ་ཡི་རྒྱན་རྣམས་དུ་མས་ཁྱོད་ཀྱི་ལུས་དང་ཡན་ལག་མཛེས་པ་ཡིས།། ཆུ་གཏེར་འགྲམ་གནས་མགྲིན་སྔོན་དགའ་བསྐྱེད་རྒྱ་མཚོའི་ལྷ་མོ་དབྱངས་ཅན་མ།། ཁྱོད་ལ་ཕྱག་འཚལ་བརྩེ་བས་བདག་བློའི་མི་ཤེས་མུན་པ་མྱུར་དུ་སོལ།། རབ་ཏུ་སྙན་པའི་དབྱངས་ལྡན་དྲི་ཟའི་བུ་མོ་རབ་མཛེས་ཡིད་འཕྲོག་མ།། ལག་གི་འདུ་བྱེད་རབ་ཏུ་བསྒྱུར་བས་ཚངས་པའི་གསུང་དབྱངས་རྣམ་འབྱུང་བས།། སྒྲ་དང་ཚད་མ་སྙན་དངགས་མངོན་བརྗོད་སྡེབ་སྦྱོར་ལེགས་བཤད་ཆོས་རྣམས་ཀུན།། ཕ་རོལ་ཡིད་འཕྲོག་མཛེས་པའི་ནུས་པ་ཅི་ཕྱིར་བདག་ལ་མི་སྩོལ་ལགས།། ཁྱོད་ཀྱི་ཐུགས་ནི་ཀུན་ཏུ་མི་གཡོ་རྒྱ་མཚོ་ཆེན་པོ་ལྟ་བུ་སྟེ།།ཐུགས་རྗེའི་རླབས་ཤུགས་དྲག་ཏུ་བསྐྱེད་པས་འགྲོ་བའི་གདུང་བ་རབ་ཏུ་སོལ།། དབང་གི་རྒྱལ་པོའི་འབྱུང་གནས་ཡིད་བཞིན་རེ་སྐོང་དབྱངས་ཅན་རྒྱ་མཚོ་ཡིས།། རྨོངས་པའི་གདུང་བས་གདུངས་པའི་སྐྱེ་བོ་རེངས་བར་སྐྱོབ་པ་དང་།། གཏི་མུག་དག་གི་བློ་དམན་སྐྱེ་བོའི་རེ་བ་མྱུར་དུ་སྐོངས།། བདག་བློའི་ཀུ་མུ་དེ་ནི་རབ་ཏུ་ཁ་ཟུམས་རྣམ་པར་གནས་པ་ལ།། བསིལ་ཟེར་བྱེད་པ་རབ་ཏུ་སྦྲིན་བྲལ་དཀྱིལ་འཁོར་རྣམ་པར་རྒྱས་པ་ཡིས།། ཀུ་མུད་ཁ་ཕྱེ་རབ་རྒྱས་ཟེའུ་འབྲུ་བསིལ་དངར་རྣམ་པར་སྤེལ་བར་མཛོད།། རབ་ཏུ་དྲི་བྲལ་སྐྱོན་གྱི་དྲི་མས་མ་ཕོག་མ་འགགས་ཁྱོད་ཀྱི་སྐུ།། ཀུན་ཏུ་ཚངས་པའི་དབྱངས་ཅན་ཅ་ཅོའི་དྲི་བྲལ་ཁྱོད་ཀྱི་གསུང་།། ཤེས་བྱ་ཀུན་ལ་ཐོགས་པ་མེད་པའི་ཡེ་ཤེས་དང་ལྡན་ཁྱོད་ཀྱི་ཐུགས།། བསྟོད་པ་འདི་ཡིས་བསྟོད་ལ་དབྱངས་ཅན་མ་ཡིས་བློ་གྲོས་མཆོག་རབ་སྩོལ།། དབྱངས་ཅན་གྱི་བསྟོད་པ་འདི་ནི། ལྷོ་ཕྱོགས་ཀྱི་རྒྱུད་དུ་བྱུང་བའི་མཁས་ཆེན་པཎྟི་ཏ་ནག་མོ་ཁོལ་གྱིས་དབྱངས་ཅན་མ་ཞལ་གཟིགས་པའི་དུས་སུ་དགྱེས་ཏེ་བསྟོད་པ་རྫོགས་སོ།།

 

དཔྱད་གཏམ།

དཔྱད་གཏམ་སྤེལ་བ།
པར་དབང་ཡོད་ཚད་ངེད་ཙོང་ཆུའི་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག
Copyright © 2010 Tsongchu.coM All rights reserved. Powered by: Tibetitw.coM
E-mail:tsongch[email protected]  QQ:1239685970 QQ:32460212  MSN:[email protected]