ད་ལྟ་ཁྱེད་ཀྱི་གནས་ཡུལ་ནི། - ཙོང་ཆུའི་དྲ་བ། >> འཕྲིན་གསར། >> ཁ་བའི་སྙིང་གཏམ།

ཁ་བའི་སྙིང་གཏམ།

[རྩོམ་གྱི་ཡོང་ཁུངས། ངེད་དྲ་བ།] [རྩོམ་པ་པོ། ཐེ་བོ་འོད་ཟེར།] [ཟླ་ཚེས། 11-03-19] [ཀློག་གྲངས། ]

 ཁ་བའི་སྙིང་གཏམ།


ཁ་བའི་འདབ་ནས་སྐྱེས་ཀྱང་།།ཁ་བ་མ་མ་བཞིན་དུ།།
          ཁ་ཕྱོགས་གང་སར་འཕུར་བ།།ཁ་བའི་ལས་དབང་ལོས་ཡིན།།

      ཁ་བའི་བརྩེ་སེམས་དཀར་པོ།།ཁ་སྙན་དབང་ལ་མ་སོང་།། 
          ཁ་འཇམ་ཁོག་དཀར་ངང་ནས།།ཁ་བའི་ལ་རྒྱ་བཟུང་རོགས།།

        ཁ་འཇམ་ཁོག་རྩུབ་བྱས་ན།།ཁ་ཟས་བདུད་རྩིར་རོལ་ཡང།། 
    ཁ་བའི་མར་རྩམ་གནང་བཞིན།།ཁ་ཟས་བྲོ་བ་མེད་འགྲོ།།

 

ཁ་བ་ཅན་ལ་བཅིངས་པའི།། ཁ་བའི་མེ་ཏོག་ཆུན་པོ།། 
         ཁ་ཁོག་མེད་པའི་ངང་ནས།།ཁ་བའི་ལྗོངས་ལ་འབུལ་འདོད།།

ཁ་ནས་གང་བྱུང་སྙིང་གཏམ།།ཁ་དང་སྣ་ལ་རེག་ན།།
        ཁ་རོགས་བཟོད་སྒོམ་ལམ་ནས།།ཁ་མཆུ་རྩོད་པ་མ་གནང་།།

            ཁ་ཕྱོགས་མེད་པའི་རྩོད་པས།།ཁ་བའི་རྗེས་ལུས་ལས་དབང་།། 
          ཁ་མདོག་འགྱུར་བ་ཙམ་ལས།།ཁ་བའི་དབུ་འཕང་སྨད་འགྲོ།།
 
          ཁ་བ་དཀར་པོའི་ཡུལ་གྱི།།ཁ་བའི་འདབ་མར་འཁྲེང་བཞིན།། 
         ཁ་དོག་རྣམ་པར་བཀྲ་བའི།།ཁ་བའི་འདུན་ལམ་སྙེགས་འགྲོ།།

  ཁ་བའི་ལས་དབང་འདི་ལ།།ཁ་དོག་མེད་པ་མིན་ཡང་།།
           ཁ་བའི་རྗེས་ལུས་དབང་གིས།།ཁ་དོག་ཀུན་ནས་དབེན་འདུག།

 ཁ་བའི་ཡུལ་ལྗོངས་འདི་ལ།།ཁ་བའི་མེས་པོ་དམ་པས།།
        ཁ་བའི་གཅེས་ནོར་རིག་གཞུང་།།ཁ་བ་ཅན་ལ་བཞག་ཡོད།།

  ཁ་བའི་གཅེས་ནོར་དེ་དག།།ཁ་བ་ཅན་གྱི་གཞོན་ནུས།།
            ཁ་གསལ་ངོས་འཛིན་ལམ་ནས།།ཁ་ཁོག་མེད་པར་སྦྱོང་དགོས།།

    ཁ་བའི་རིག་གཞུང་འདི་ལ།།ཁ་དོག་རྣམ་པར་བཀྲ་བས།།
  ཁ་དོག་དབྱེར་མེད་མི་མང་།།ཁ་བ་ཅན་ལ་འཁོར་ཡོད།།

       ཁ་ཁོག་གཉིས་མེད་ངང་ནས།།ཁ་བའི་ལས་དབང་དོན་དུ།། 
               ཁ་ཙམ་མིན་པའི་འབད་འབུངས།།ཁ་བའི་གཞོན་ནུས་ལོས་ཤེས།།

   ཁ་བ་ཅན་གྱི་གཞོན་ནུས།།ཁ་བའི་ལས་དབང་མཁོ་བའི།། 
             ཁ་བརྡ་གླེང་མོལ་ཚུན་ཆད།།ཁ་བའི་གོམས་གཤིས་འཛིན་དགོས།།

   ཁ་བའི་སྤྱི་ཚོགས་ཧྲིལ་བོར།།ཁ་སྐད་སྣ་ཚོགས་འདྲེས་ན།།
ཁ་བ་ཅན་གྱི་ཚེ་སྲོག།།ཁ་ནས་འཇིག་འགོ་བརྩམ་འགྲོ།།

ཁ་སྐད་གཙང་མའི་ལམ་ནས།།ཁ་བ་ཅན་གྱི་སྐད་ཡིག།།
          ཁ་བའི་རང་བཞིན་ལྡན་པ།།ཁ་བའི་གཞོན་ནུས་འཛིན་དགོས།།

  ཁ་བའི་ཕ་སྐད་གཙང་མ།།ཁ་ནས་གསལ་དག་བརྗོད་ན།།
  ཁ་བའི་ཚེ་སྲོག་འདི་ལ།།ཁ་ནས་གསོན་ཤུགས་སྟེར་འགྲོ།།

  ཁ་སྐད་འདྲེས་མ་སྣ་ཚོགས།།ཁ་ནས་གང་བྱུང་འཐོར་བ།། 
     ཁ་ལྕེའི་འབྱོན་ཐང་སྒོམ་ཡང་།།ཁ་བའི་གཤེད་མ་ཡིན་འགྲོ།།

 ཁ་སྐད་གཙང་མ་འདི་ལ།།ཁ་བའི་རྒན་གཞོན་ཚང་མས།།
    ཁ་ཙམ་མིན་པའི་སྒོ་ནས།།ཁ་ནས་གཅེས་སྐྱོང་བརྩམ་འགྲོ།། 
 

 ཁ་བའི་ཕ་ས་འདི་ལ། །         ཁ་མིན་དོན་གྱི་འབྲས་བུ།།
       ཁ་བའི་མི་རབས་འདི་ཡིས།།ཁ་གསལ་འཇོག་རན་མིན་འགྲོ།།
 

དཔྱད་གཏམ།

དཔྱད་གཏམ་སྤེལ་བ།
པར་དབང་ཡོད་ཚད་ངེད་ཙོང་ཆུའི་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག
Copyright © 2010 Tsongchu.coM All rights reserved. Powered by: Tibetitw.coM
E-mail:[email protected]  QQ:1239685970 QQ:32460212  MSN:[email protected]