ད་ལྟ་ཁྱེད་ཀྱི་གནས་ཡུལ་ནི། - ཙོང་ཆུའི་དྲ་བ། >> བསླབ་བྱ། >> མདོ་སྔགས་ཀྱི་གཞུང་ལ་སློབ་གཉེར་བྱེད་ཚུལ་གྱི་བསླབ་བྱ་ནོར་བུའི་གླིང་དུ་བགྲོད་པའི་བསླབ་བྱ་སྐོར་བཞུགས་སོ།

མདོ་སྔགས་ཀྱི་གཞུང་ལ་སློབ་གཉེར་བྱེད་ཚུལ་གྱི་བསླབ་བྱ་ནོར་བུའི་གླིང་དུ་བགྲོད་པའི་བསླབ་བྱ་སྐོར་བཞུགས་སོ།

[རྩོམ་གྱི་ཡོང་ཁུངས། ངེད་དྲ་བ།] [རྩོམ་པ་པོ། དཀོན་མཆོག་བསྟན་པའི་སྒྲོན་མེ།] [ཟླ་ཚེས། 12-01-03] [ཀློག་གྲངས། ]

         ༄༅། ། རྒྱལ་ཀུན་མཁྱེན་རབ་གཅིག་བསྡུས་འཇམ་པའི་དབྱངས། ། དུར་སྨིག་གར་གྱིས་རྣམ་རོལ་ཙོང་ཁ་པ། ། དངོས་གྲུབ་ཀུན་སྩོལ་བཅོམ་ལྡན་གཤིན་རྗེའི་གཤེད། ། རྣམ་གསུམ་དབྱེར་མེད་ཞབས་ཀྱི་པདྨོ་ལ། ། གུས་པས་འདུད་དོ་བརྩེ་བས་རྗེས་སུ་ཟུངས། ། སྐྱེ་བར་བཏགས་པས་མངོན་རློམ་ཚངས་པ་དང་། ། ཁེངས་དྲེགས་འབྱོར་པས་གཡེང་བའི་འདོད་ལྷའི་རིགས། ། མ་ཡེང་བློ་གསལ་ཚུལ་མཐུན་དོན་གཉེར་ཅན། ། སློབ་གཉེར་ཚུལ་བཞིན་བྱེད་བར་འདོད་རྣམས་ལ། ། གདམས་ངག་ཅུང་ཟད་སྦྱིན་ནོ་ཉོན་ཅིག་ཨང་། ། དལ་བའིརྟེན་ཐོབ་རྒྱལ་བའི་བསྟན་དང་མཇལ། ། མཚན་ལྡན་བཤེས་དང་ཆོས་མཐུན་གྲོགས་ཀྱིས་བསྐྱངས། །མཐུན་རྐྱེན་རྟེན་འབྲེལ་འཛོམས་པ་འདི་འདྲ་བ། ། ཡང་ཡང་རྙེད་པར་དཀའ་ལ་དན་ཆེ་བས། ། ཕྱི་བཤོལ་སྤངས་ཏེ་སྙིང་པོ་ལོངས་ཤིག་ཨང་། ། ལས་ཀྱིས་བསྡུས་པའིཕ་ཡུལ་ཉེ་དུ་ཀུན། ། བཞག་སྟེ་རྒྱང་རིང་ཡུལ་དུ་སོང་ན་ཡང་། ། རྒྱུས་མེད་ཡུལ་ནས་དོན་མེད་མཛའ་བཤེས་སོགས། ། བསྡུས་ཏེ་རྣམ་གཡེང་བྱེད་པ་སྨྱོན་བ་ཡིན། ། འོངས་དོན་ཐོས་བསམ་ལས་ལ་སྒྲིམས་ཤིག་ཨང་། ། སྒོ་གསུམ་དགེ་ལ་སྦྱར་ཕྱིར་མིང་དང་དོན། ། མཐུན་པའི་བཤེས་ཤིག་རང་གི་དགེ་རྒན་དུ། ། བསྟེན་ནསཆོས་ཀྱི་བྱ་བ་མ་ལུས་པའི། ། རྩ་པར་མཐོང་སྟེ་བཀའ་བཞིནབསྒྲུབསཔ་ཡིས། ། རྟེན་འབྲེལ་འགོ་ནས་འགྲིགས་པར་གྱིས་ཤིག་ཨང་། ། སྡིག་གྲོགས་ཡིན་ཞེས་རྭ་ཅན་མི་འབྱུང་གིས། ། གཅེས་ཤིང་ཕན་པའི་ཟོལ་གྱིས་འཛུམ་བསྟན་ནས། ། རྩེ་རྒོད་གཡེང་བའི་གྲོགས་བྱེད་བག་མེད་ཀྱི། ། ལས་ལ་སྦྱོར་དེ་སྡིག་པའི་གྲོགས་ཡིན་པས། ། འགོ་བའི་ནད་བཞིན་རིང་དུ་སྤོངས་ཤིག་ཨང་། ། ཆ་རྐྱེན་ཡོད་ན་མི་བཟོད་མྱུར་དུ་བརླག ། མེད་ན་མི་བཟོད་བུ་ལོན་སྟོང་འཇལ་བྱེད། །ཅི་བྱས་ཆོས་ཀྱི་གེགས་སུ་འགྲོ་བ་འདི། །གྲོགས་ངན་འདུ་འཚོགས་མང་བའི་སྐྱོན་ཡིན་པས། ། བསེ་རུ་ལྟ་བུར་གནས་པར་གྱིས་ཤིག་ཨང་། ། མིང་ལ་མཐུན་རྐྱེན་ཟེར་ཡང་ཆོས་ཕྱོགས་ལས། ། ཉམས་བྱེད་འདོད་ཡོན་བདུད་ཀྱིགཡབ་མོ་སྟེ། ། འདོད་ཆུང་ཆོག་ཤེས་སྔོན་བྱོན་དམ་པ་རྣམས། ། དངུལ་བསམ་མ་ནོར་དོན་གཉིས་རྩེར་སོན་པས། །འཕྲལ་ཕུགས་ཁེ་ཉེན་གང་ཆེ་དཔྱོད་ཅིག་ཨང་། ། གདོལ་སྤྱོད་ཁྱིམ་བའི་རྗེས་འཇུག་གཡོ་ཁྲམ་མཁན། ། ཆོས་མིན་སྤྱོད་པའི་ཐན་སྙེ་མགོ་འཕང་མཐོ། ། ལྟོ་སྐྱ་གོས་ཧྲུལ་ཐོས་དང་ཚུལ་ཁྲིམས་ཀྱི། ། བཅུད་ལྡན་སྙེ་མའི་མགོ་བོ་དམའ་ན་ཡང་། ། གཏན་གྱི་སྐྱིད་སྡུག་འདྲ་འདྲ་མིན་ནོ་ཨང་། ། བླ་མ་ལ་གུས་མཐོལ་ཕྲག་དོག་མེད། ། དམན་ལ་བརྩེ་སོགས་ནང་ནས་དུལ་གྱུར་ན། ། ཕྱི་བལྟས་ཅོལ་ཆུང་སྐྱེ་བོས་མངགས་ཚད་ལ། ། མི་ཉན་གྱོང་པོར་སྣང་ཡང་སྐྱོན་མེད་པར། ། ཕྱི་འཇམ་ཁོང་རྩུབ་སྤྱོད་པ་སྤོངས་ཤིག་ཨང་། ། མངོན་མཐོ་ངེས་ལེགས་ཡོན་ཏན་ཀུན་གྱི་རྒྱུ། ། བསྟན་པའི་གཞི་མ་ལྷག་པའི་ཚུལ་ཁྲིམས་འདི། ། རྣམ་གྲོལ་དོན་གཉེར་ལམ་གྱི་སྲོག་ཡིན་ཀྱང་། ། ཚུལ་འཆོས་སྤྱོད་པ་འདི་ཡིས་ཐར་དཀའ་བས། ། བསླབ་ཁྲིམས་ངོ་ལྐོག་མེད་པར་སྲུངས་ཤིག་ཨང་། ། ཀུན་སྤྱོད་གཙང་བས་གཞན་གྱི་ཡིད་དུ་འཐད། ། སྨྲ་བ་ཉུང་བས་ཕོག་ཐུག་གཡེང་བ་མེད། ། དད་བརྩོན་དྲན་ཤེས་བརྟན་པོས་ཉིན་རེ་བཞིན། ། ཡོན་ཏན་ཡར་ཚེས་ཟླ་ལྟར་འཕེལ་འགྱུར་བས། ། སྒོ་གསུམ་བག་དང་ལྡན་པར་གྱིས་ཤིག་ཨང་། ། དང་པོ་ཐོས་པའི་སྒྲོན་མེ་མ་སྦར་ན། ། ཀུན་ནས་ཉོན་མོངས་སྲིད་པའི་སྐྱོན་མཚང་དང་། ། རྣམ་བྱང་ཐར་པའི་ལམ་གྱི་བསྒྲོང་ཚུལ་སོགས། །བླང་དོར་ཇི་ལྟར་བྱ་བ་མི་ཤེས་པས། ། ཐོས་པས་བློ་མིག་སྤྱངས་པར་གྱིས་ཤིག་ཨང་། ། དོན་གྱི་རྒན་པོ་ཚིག་གི་འཁར་བ་ལ། ། བརྟེན་ཕྱིར་གཞུང་ཚིག་བློ་འཛིན་མི་བྱེད་པར། ། དཔེ་ཀློག་ཙམ་དང་ངག་སྒྲོས་ཐན་ཐུན་ཀྱིས། ། ཉིན་རེ་འགྲོ་ཐབས་དེས་ཀྱང་མི་ཕན་པས། ། དཔེ་འཛིན་སྐྱོར་སྦྱངས་ཡུན་དུ་གྱིས་ཤིག་ཨང་། ། གཞུང་ཚིག་མང་དུ་བཟུང་སྟེ་བསྐྱར་ན་ཡང་། ། དོན་ལ་མི་སེམས་རིམ་གྲོའི་ཆོས་ཀློག་དང་། ། ནེ་ཚོའི་འདོན་པ་ལྟ་བུ་བརྒྱ་ཚར་གྱིས། །བརྗོད་བྱའི་གནད་ལ་སྒྲོ་འདོགས་མི་ཆོད་པས། ། དོན་ལ་བརྟགས་དཔྱད་ཞིབ་མོ་གྱིས་ཤིག་ཨང་། ། ཀུན་བྱང་འཇུག་ལྡོག་ཚུལ་ལ་མ་རྨོངས་ཤིང་། ། ཚོགས་ཀྱི་དབུས་སུ་སྨྲ་མཁས་དང་འདོད་ན། ། ད་ལྟ་བཟའ་བཏུང་གཉིད་ཀྱི་བདེ་བ་ལ། ། ཆགས་པའི་སྐྱིད་ཆོས་འདི་ཡིས་མི་འགྲུབ་པས། ། དཀའ་སྦྱོང་སྡུག་རུས་བཟོད་པར་གྱིས་ཤིག་ཨང་། ། ཉིན་རེ་ཟསཀྱང་མི་དྲན་བརྩོན་འགྲུས་རྩོམ། ། ཞུགས་མ་ཐག་ནས་མཁས་པའི་གོ་འཕང་འདོད། ། ཞག་གསུམ་ལོན་ཚེ་རྗེས་མེད་གཡེང་བས་ཁྱེར། ། དེ་འདྲ་དེ་ལ་ཅི་ཡང་མི་ཡོང་བས། ། བརྩོན་པ་ཆུ་བོའི་རྒྱུན་བཞིན་སྟེན་ཅིག་ཨང་། ། དཀོར་དང་སྒྲིབ་བས་བྱིང་ཞིང་རྨུགས་བའི་སྟེང་། ། ད་དུང་ཟས་དང་གཉིད་ཀྱི་ཚོད་མི་རིག ། ལང་ཤོར་ཟློ་ངན་འཕྲོ་ཞིང་རྒོད་པའི་ཐོག ། ཕྱི་ཕྱིར་འཆལ་གཏམ་དུ་མས་གཡེང་བ་སོགས། ། དགག་བྱའི་རིགས་ལ་བསྒྲུབ་བྱར་མ་འཛིན་ཨང་། །སྐྱོན་ཡོན་བླང་དོར་རང་གིས་མི་བྱེད་པར། ། གྲགས་སྐམ་འུད་ཀྱི་རྗེས་སུ་འབྲང་ན་ཡང་། ། ཉེས་སྐྱོན་སུ་ཡིས་ལག་པས་མི་སེལ་ལ། ། ཡོན་ཏན་སུས་ཀྱང་ཁ་རུ་མི་ལྡུག་བས། ། བླུན་པོ་ཆུ་སྣ་གར་ཁྲིད་མ་བྱེད་ཨང་། ། ཟབ་ཟབ་མན་ངག་ཟེར་དགུ་ཚོལ་པ་དང་། ། ཐོབ་ཐོབ་མང་པོའི་རྣམ་གྲངས་གསོག་བྱེད་ཅིང་། ། སྒྲ་སྙན་སྨན་རྩིས་སོགས་ལ་མགོ་འཁོར་བ། ། གཞུང་ལུགས་ཐོས་བསམ་རྣལ་མའི་གེགས་ཡིན་པས། ། རྩ་བ་བོར་ནས་ཡལ་ག་མ་འཛིན་ཨང་། ། རང་རང་གཞུང་གི་བརྗོད་བྱ་དགོས་དོན་སོགས། ། མ་མཐོང་ཤག་འགྱེད་ཚིག་འཁྲི་སྐམ་པོ་དང་། ། རིགས་པས་དཔྱད་པ་མི་བཟོད་གོ་ཐོབ་ཀྱི། ། ཕམ་བཤད་འདིས་ཀྱང་བརྡར་ཤ་མི་ཆོད་པས། ། གོ་རིགས་ཟུང་དུ་འབྲེལ་བར་སྐྱོངས་ཤིག་ཨང་། ། འཁྲུལ་བྲལ་གཞུང་རེ་ངེས་བཟུང་གཞིར་བྱས་ནས། ། གཞན་རྣམས་དེ་དང་སྦྱརཏེ་དཔྱོད་པ་ལས། ། གང་བྱུང་དཔེ་ལ་ལྟ་ཞིང་ཐམས་ཅད་ཀྱི། ། རྗེས་སུ་འབྲངས་བ་ཤེས་རབ་འཆལ་འགྱུར་བས། ། རང་ལུགས་གཏད་སོ་ཡོད་པར་གྱིས་ཤིག་ཨང་། ། དཔྱད་པས་ངེས་བ་ལམ་ཙམ་རྙེད་ན་ཡང་། ། ཆོས་ཚུལ་ཟབ་པས་ཐག་ཆོད་མི་སྔ་ཞིང་། །འགྲིག་འགྲིག་མང་པས་རྣམ་རྟོག་རྒྱ་སྐྱེད་པས། ། དཔྱད་པ་མ་ཐལ་གཞུང་ལ་འཁྲིལ་བཞིན་དུ། ། རྒྱས་བསྡུས་འཚམཔའི་དཔྱད་ཚུལ་གྱིས་ཤིག་ཨང་། ། མ་རིག་མུན་སེལ་ཐོས་བའི་མེ་སྦར་ཡང་། ། ང་རྒྱལ་དུ་བའི་ངོ་བོར་འཁྱིལ་པ་ཡིས། ། ཕྱི་ཕྱིར་སྐྱོན་ཡོན་མཐོང་བསྒྲིབ་བྱེད་ལ། ། ཆོས་སུ་སོང་ན་ཤེས་རྒྱུད་དུལ་དོགས་པས། ། སྙེམ་ལོངས་བ་མ་གོ་འཕང་མ་མཐོ་ཨང་། ། མཐོན་པོའི་སྒང་ལ་ཆུ་བེ་མི་ཆགས་པས། ། དམན་ས་བཟུང་སྟེ་གུས་པའི་བརྟུལ་ཞུགས་ཀྱིས། ། ཆོས་མཐུན་བློ་ཁ་མཐོ་བ་ཐམས་ཅད་ལས། ། བློ་སྐྱེད་གང་ལོན་བྲེ་སོག་ཕུལ་སོག་གིས། ། སྒྲོ་འདོགས་འཕྲལ་དང་འཕྲལ་དུ་ཆོད་ཅིག་ཨང་། ། དབུ་ཚད་ཟུང་དུ་འཇུག་པའི་ལྟ་བ་དང་། ། ཆོས་མངོན་མཛོད་དང་ཕ་རོལ་ཕྱིན་པའི་སྒོམ། །བསྟན་པའི་ནང་མཛོད་འདུལ་བའི་སྤྱོད་བ་རྣམས། ། མ་ཚང་བསླབ་གསུམ་ཡ་བྲལ་འགྱུར་བའི་ཕྱིར། ། བཀའ་བོད་ལྔ་ལ་ཚང་པར་སྦྱོངས་ཤིག་ཨང་། ། དཀའ་བས་བསགས་པའི་མང་ཐོས་ནོར་བུ་ཡང་། ། བརྗེད་ངེས་རྐུན་པོས་དལ་གྱིས་འཇོམས་བྱས་ཏེ། ། རིན་ཆེན་གླིང་ནས་སྟོང་པར་ལྡོག་སྲིད་པས། ། རྒྱུན་དུ་གོམས་འདིས་དྲན་ཤེས་བརྟན་པོ་ཡིས། ། གང་ཤེས་བརྗེད་པ་མེད་པར་སོགས་ཤིག་ཡང་། ། སྙིགས་དུས་བློ་དང་བསོད་ནམས་དམན་པའི་ཕྱིར། ། ལྷག་པའི་ལྷ་དང་ཡི་དམ་ཆོས་སྲུང་ལ། ། རྩེ་གཅིག་གསོལ་འདེབས་ཕྱག་མཆོད་མཎྜལ་སོགས། ། ཚོགས་བསགས་སྒྲིབ་སྦྱོང་འབད་པ་དྲག་པོ་ཡིས། ། ཞིང་གི་མཐུ་ལ་རྒྱབ་བརྟེན་གྱིས་ཤིག་ཨང་། ། ཐུན་མོང་ལམ་སྦྱངས་སྔོན་དུ་མ་སོང་ཞིང་། །གཞུང་དོན་ལྟ་བའི་བློ་མིག་མ་ཕྱེ་བར། ། ཆོ་གའི་ངག་འདོན་བྱང་བ་ཙམ་ཞིག་གིས། ། གསང་སྔགས་འཆང་བའི་གྲལ་དུ་མི་ཚུད་པས། །བསྟན་ལ་རིམ་པ་བཞིན་དུ་སློབས་ཤིག་ཨང་། ། གསང་ཆེན་རྒྱུད་ཀྱི་རྒྱལ་པོའི་སྨན་ཧྲོག་རྣམས། ། སྦྱོར་བར་བསྡེབས་པ་བསྐྱེད་རྫོགས་རིམ་པ་སོགས། ། ཡིན་ཕྱིར་གཞུང་ལུགས་ཆེ་རྣམས་ཡལ་པོར་ནས། ། མན་ངག་ཁོ་ནར་དགའ་བ་གནས་མིན་པས། ། རྩ་བཤད་སྦྱར་ཏེ་རྒྱུད་དོན་ཚོལ་ཅིག་ཨང་། ། གསང་སྔགས་དེ་ཡང་འཕྲལ་གྱི་རྐྱེན་སེལ་ལམ། ། ཚེ་དང་ནོར་སྒྲུབ་དབང་སྡུད་མངོན་སྤྱོད་སོགས། ། ཚེ་འདིའི་ལག་ཆ་ཁོ་ནར་འཁྱེར་བ་ནི། ། སམཆོག་ཙན་དན་སོལ་བར་བྱས་འདྲ་བས། ། ཆོས་ཀྱིས་ངན་སོང་བསྒྲུབས་པ་མ་བྱེད་ཨང་། ། སྔགས་གཞུང་ཐོས་བསམ་བྱས་པའི་ཉིང་དགོས་སུ། ། རྒྱལ་ཀུན་དགོངས་པ་གཅིག་གྱུར་རྟག་པའི་བཀའ། ། དངོས་གྲུབ་རྩ་བ་དམ་ཚིག་བསྲུང་བ་འདིར། ། འབབ་པའི་ཚུལ་ལ་གོ་བ་གཏིང་ཚུགས་པས། ། གཏན་འདུན་འཆུག་པ་མེད་པར་གྱིས་ཤིག་ཨང་། ། ཁྱད་པར་ལྟ་བ་སྙིགས་མའི་གནས་སྐབས་འདིར། །དམ་བཅའ་ཙམ་གྱིས་མཁས་རློམ་སྐྱེ་བོ་ཡི། ། སྔོན་མེད་ལེགས་བཤད་སྐད་ཀྱི་འཆལ་གཏམ་ཡང་། ། བསོད་ཆུང་ཤེས་འཆལ་རྣམས་ཀྱི་རྣར་འགྲོ་བས། ། རི་བོང་ཅལ་གྱི་རྗེས་སུ་མ་རྒྱུགས་ཨང་། ། འཇམ་པའི་དབྱངས་ཀྱིས་ཉིན་བཞིན་གདམས་བ་ཡིས། ། རྒྱལ་བའི་དགོངས་བ་མཐར་དག་མངོན་གྱུར་བ། ། བློ་བཟང་རྒྱལ་བ་ཡིས་ཀྱང་མ་ཐོན་པའི། ། གསར་བཤད་ཕྲ་མེན་མ་ཡི་སོ་ནམ་དེས། ། ཕན་ལས་གནོད་པ་ཆེ་བས་སྒྲིམས་ཤིག་ཨང་། ། ཐུགས་བཅུད་ཟབ་མོར་བསྔགས་པ་ཙམ་མིན་བར། ། རྒྱན་དྲུག་མཆོག་གཉིས་གྲུབ་ཆེན་ཐམས་ཅད་ཀྱི། ། རང་གཞུང་དབང་པོར་བཞུགས་པའི་མདོ་རྒྱུད་ཀུན། ། གསལ་བྱེད་རྒྱལ་པ་གཉིས་པའི་ལུགསབཟང་འདིར། ། བློ་རྩེ་གཅིག་ཏུ་དྲིལ་ཏེ་འཇུས་ཤིག་ཨང་། ། གར་རྒྱུག་ཕྱོགས་སུ་དཀྱུས་སྟོན་བྱེད་པ་བཞིན། ། དང་པོ་ཉིད་ནས་གཅིག་ཤེས་གཉིས་ཤེས་ཀུན། ། སྲིད་པར་འཁྱེར་བའི་དམུ་རྒོད་སེམས་ཀྱི་རྟ། ། འདི་ཉིད་གདུལ་ཐབས་ཁོ་ནར་འཁྱེར་བ་ཡིས། ། ཐོས་བསམ་ཆོས་སུ་འགྲོ་བར་གྱིས་ཤིག་ཨང་། ། འཁོར་ལོ་བཞི་ལྡན་རྟེན་བཟང་ཐོབ་སྐབས་འདི། ། འཁོར་བའི་འཆིང་བ་གཅོད་པའི་དུས་ཡིན་པས། ། འཁོར་གསུམ་སྐོར་བའི་ཐབས་ཙམ་མ་ཡིན་པར། །འཁོར་ལོ་གསུམ་གྱི་དགོངས་དོན་ངེས་རྙེད་ནས། ། འཁོར་གསུམ་དག་པའི་དགེ་སྦྱོར་གྱིས་ཤིག་ཨང་། ། ཆོས་ཀྱི་རྩ་བ་བསམ་པའི་བཟང་ངན་ཡིན། ། ཆོས་ཀྱི་སྒོ་འབྱེད་རྣམ་དག་ཐོས་པ་ཡིན། ། ཆོས་སུ་སོང་ཚད་འདི་སྣང་ཞེན་ལོག་ཡིན། ། ཆོས་ཀྱི་སྙིང་པོ་ཐབས་ཤེས་ཟུང་འཇུག་ཡིན། ། ཆོས་ལ་ཆོས་བཞིན་སྤྱོད་པར་གྱིས་ཤིག་ཨང་། ། རྣམ་མང་གཞུང་ལུགས་ཟབ་ཡངས་ཆུ་གཏེར་ལས། ། རྣམ་དག་ཐོས་བའི་ནོར་བུ་ལེན་པའི་ཚུལ། ། རྣམ་པར་བཤད་པའི་མིག་སྨན་ཐུར་མ་ཡིས། ། རྣམ་གྲོལ་དོན་གཉེར་ཡོངས་ཀྱི་མིག་ཕྱེ་སྟེ། ། རྣམ་ཀུན་མཁྱེན་པའི་དཔལ་ལ་སྤྱོད་གྱུར་ཅིག །ཅེས་མདོ་སྔགས་ཀྱི་གཞུང་ལ་སློབ་གཉེར་བྱེད་ཚུལ་གྱི་བསླབ་བྱ་ནོར་བུའི་གླིང་དུ་བགྲོད་པའི་ལམ་ཡིག་ཅེས་བྱ་བ་འདི་ནི། སྤྱིར་དེང་སང་བསྟན་པ་སྙིགས་མའི་མཐར་སོན་བའི་དབང་གིས་ཉམས་ལེན་དགོས་པའི་གཏམ་ཙམ་ཡང་ནུབ། ཐོས་བསམ་དགོས་པའི་གཏམ་ཙམ་ཡོད་ཀྱང་། གང་ལ་ཐོས་པ་བྱ་བའི་ཡུལ་དང་། ཐོས་པ་ཇི་ལྟར་བྱེད་བའི་ཚུལ་སོགས་ལེགས་པར་ཤེས་པ་ཤིན་ཏུ་དཀོན་པར་སྣང་བས། འདི་འདྲ་ཞིག་འབྲི་འདུན་སྔར་ནས་ཡོད་པའི་ཐོག་ཉེ་ཆར་དར་ཧན་བེའི་ལིའི་ཤོག་ནས་བློ་དང་ལྡན་པ་དགེ་སློང་དཀོན་མཆོག་རྡོ་རྗེ་བསྐུལ་བའི་ངོར་༧་བཙུན་པ་དཀོན་མཆོག་བསྟན་པའི་སྒྲོན་མེས་ཐོས་དོན་རྒྱུད་ལ་སྦྱར་བའི་ཉམས་ལེན་མ་ཐུབ་ཀྱང་། བླ་མ་གོང་མ་ཞིག་གི་མིང་ཙམ་ལ་སྐྱབས་སུ་མ་མཆི་བར་གྲྭ་རྒྱང་དཀྱུས་མའི་ལུགས་བཞིན་སློབ་གཉེར་ལ་སྡུག་རུས་ཅུང་ཟད་བྱས་པའི་རང་མྱོང་དང་། དམ་པ་གོང་མའི་གསུང་རྒྱུན་ལ་བརྟེན་ནས་རགས་རིམ་ཞིག་བྲིས་པའི་མཚམས་སུ་ད་ལྟ་ཕན་པར་སྨྲས་ཀྱང་གོ་བ་དཀོན་པར་སྣང་པས་དགོས་པ་མི་འདུག་སྙམ་ནས་བཞག་པའི་ཚེ། བསྟན་ལ་གཅིག་ཏུ་སྨན་པའི་ལྷག་བསམ་དང་མཁྱེན་རབ་ཀྱི་དབང་ཕྱུག་དམ་པ་དགོན་པའི་ཁྲི་ཐོག་པ་དཀོན་མཆོག་རྒྱལ་མཚན་པས་འདིའིའཕྲོ་བསྐང་སྟེ་ཆ་ཚང་བ་ཞིག་དགོས་ཞེས་ནན་ཏན་གནང་པ་བཞིན་མཇུག་གྲུབ་པར་བྱས་པའི་ཡི་གེ་བ་ནི་དགེ་སློང་དཀོན་མཆོག་ཀུན་དགས་བགྱིས་པ་འདིས་ཀྱང་དོན་གཉེར་ཅན་རྣམས་ལ་ཕན་ཐོགས་པར་གྱུར་ཅིག །ཡང་དག་ལམ་བཟང་གསལ་མཛད་བླ་མ་དང་། །རབ་འབྱམས་རྒྱལ་བ་སྲས་དང་བཅས་རྣམས་ལ། ། རྣམ་དག་དད་པས་ལན་བརྒྱར་ཕྱག་བྱས་ནས། ། སྤངས་བླང་རྣམ་གཞག་འགའ་ཙམ་བསྙད་པར་བྱ། ། བསླབ་པར་བྱ་བ་རྣམ་གྲངས་མང་ན་ཡང་། ། གནད་ལ་ཕན་པ་རང་ལ་རག་ལས་པས། ། བྱ་བ་གང་ལའང་ལས་འབྲས་དཔང་བཞག་ནས། ། རྣམ་དཀར་ལས་ལམ་དག་ལ་འབད་པར་བྱ། ། དལ་བ་བརྒྱད་ལྡན་སངས་རྒྱས་བསྟན་དང་ཕྲད། ། མཚན་ལྡན་བླ་མ་དམ་པ་དག་དང་མཇལ། །ད་ལན་འདྲ་བ་སླན་ཆད་ཚང་དཀའ་བ། ། ཡང་ཡང་བསམ་ནས་དལ་བ་འབྲས་ལྡན་འཚལ། །ཁས་བླངས་བཅས་མཚམས་ཕྲ་རགས་ཐམས་ཅད་ལ། ། ནན་ཏན་བསམ་པ་ཐག་པས་འབད་བྱས་ན། ། སྲས་བཅས་རྒྱལ་བས་རབ་བསྔགས་ལམ་བཟང་ཡང་། ། རང་རང་ལག་ན་གནས་པས་འབད་པར་འཚལ། ། ཟབ་རྒྱས་མན་ངག་མཐའ་ཡས་མཉན་ན་ཡང་། ། ཁ་བཤད་ཙམ་ལ་འཕྱན་ན་ཕན་དཀའ་བས། ། མཐའ་དག་རང་རང་བསམ་པ་དང་སྦྱར་ནས། ། ནན་ཏན་ལག་བླང་བྱ་བ་མན་ངག་གནད། ། སྔ་ཆར་མཚན་ལྡན་བླ་མ་དམ་པ་བཙལ། ། སླད་ནས་ཟབ་རྒྱས་གདམས་ངག་ཚང་བར་མཉན། ། ཐ་མར་གདམས་ངག་མཐའ་དག་ཉམས་བླངས་ན། ། སངས་རྒྱས་སར་ཆས་སྐལ་བཟང་ལྡན་པ་ལགས། ། བསམ་རྒྱ་མ་མང་གང་བརྩམས་ཕ་མཐར་བསྐྱལ། ། སྐྱབས་གནས་དམ་པ་རྣམས་ལ་དད་པ་སྦྱངས། ། དཀར་ནག་ལས་འབྲས་བསམ་ནས་སྤངས་བླང་བྱ། ། འབད་པ་འབྲས་དང་བྲལ་ལ་ངལ་བ་སྤངས། ། གཞན་ལ་བསམ་ངན་འཆང་བས་རང་རང་ཉམས། ། འཆལ་གཏམ་སྨྲ་བ་མང་བས་བྱ་བ་འཆག ། ང་རྒྱལ་ཆགས་སྡང་ཅན་ལ་དགྲ་སྡང་བས། ། རང་དང་གཞན་ལ་གང་ཕན་བརྟག་ནས་བྱ། ། རྒྱལ་དང་རྒྱལ་སྲས་བཅས་པ་ཐམསཅད་ཀྱང་། ། ལྷག་བསམ་རྣམ་པར་དག་པ་ལས་བལྟམས་པས། ། རྟག་པརགཞན་ཕན་བསམ་པ་སྦྱངས་པ་དང་། ། མཐའ་བྲལ་ཡང་དག་ལྟ་བས་རྒྱས་གདབ་བྱ། ། སྔར་བསགས་ལས་ངན་མཐའ་དག་འབད་པ་བ་རྒྱས། ། བཤགསནས་གཡང་ས་ཉམ་པ་དགག་པ་དང་། ། རྣམ་དཀར་གང་བྱས་མརྒན་ཐམས་ཅད་ལ། ། ཕན་སླད་བསམ་པ་ཐག་པས་མཚམས་སྦྱར་བྱ། ། ལུགས་ཟུང་སྒྲུབ་ཚུལ་གཞུང་ལུགས་ཉུང་བསྡུས་སུ། ། འགྲིག་འགྲིག་ཚིག་གི་པིར་གྱིས་བྲིས་འདི་ཡིས། ། ལེགས་ཉེས་འབྱེད་བྱེད་ཡེ་ཤེས་གཏེར་རྙེད་དེ། ། སྟོབས་སོགས་ཡོངས་རྫོགས་མགོན་པོ་མཆོག་ཐོབ་ཤོག ། དུས་གསུམ་གྱི་རྒྱལ་བ་ཀུན་ལས་ཀྱང་། ། དྲིན་འཁོར་མཐའ་མེད་པའི་ཐུགས་རྗེ་ཅན། ། ཐ་མལ་གྱི་ཚུལ་འཛིན་དང་པོའི་མགོན། ། ཕ་བླ་མ་སྙིང་གི་ཟེའུ་འབྲུར་བཞུགས། ། གནས་འཁོར་བར་འཁྱམས་པའི་ཐོག་མ་མེད། ། སྒོས་ངན་སོང་གསུམ་གྱི་བཙོན་དོང་དུ། ། བཟོད་མེད་ཀྱི་སྡུག་བསྔལ་མྱོང་མྱོང་ནས། ། དུས་ད་ལན་དལ་བའི་རྟེན་ཅིག་རྙེད། ། ཚེ་མི་རྟག་གཉིད་ཀྱི་ཐུན་ཆུང་ལ། ། དོན་མེད་ཀྱི་དགའ་སྡུག་རྨི་ལམ་འཁྲུག ། གློ་བུར་དུ་སད་དུས་ངན་སོང་གི ། ཚེར་དོང་དེར་ཡོད་ན་ཅི་རང་བྱེད། ། དུས་ད་ལྟ་རང་དབང་རང་ལ་ཡོད། ། མགོན་སྐྱབས་དང་དཔུང་གཉེན་བཙལ་ན་ལེགས། ། འཇིགས་ཡེར་རེ་གཤིན་རྗེས་ཁྲིད་པའི་ཚེ། ། སྐྱབས་མེད་ཀྱི་སྡུག་སྨྲས་སུ་ལ་འདོན། ། དྲོའཇམ་གྱི་གོས་དར་འཛོམ་ན་ཡང་། ། དེ་ཡུན་རིང་གྱོན་གྱི་རང་དབང་མེད། ། རབ་འབར་གྱི་ལྕགས་སྲེག་ལེབ་མོ་དེ། ། གྱོན་མ་དགོས་ཙམ་ཞིག་མཛད་ན་ལེགས། ། ཟས་ཞིམ་མངར་འཛོམ་པའི་དཀོར་ནག་ལ། ། འཛེམ་མེད་དུ་སྤྱོད་པའི་དྲེད་པོ་ཁྱོད། ། ལོབ་བྱེ་བ་འབུམ་ཕྲག་སྟོང་གི་བར། ། ཟངས་ཞུན་གྱི་ཁུ་བ་འཐུང་ནུས་སམ། ། གཉེན་མཛའ་བཤེས་མང་ཡང་ཟ་གྲོགས་ཡིན། ། ལམ་རྒྱུས་མེད་ཀྱི་འཕྲང་དུ་གཅིག་པུར་འགྲོ། ། ལས་བསགས་པའི་རྣམ་སྨིན་རང་གིས་མྱོང་། ། འདི་སོམས་ལ་མཐུན་འཇུག་གཡེང་བ་སྤོངས། ། ཕྱོགས་ཐག་རིང་མགྲོན་པོའི་ལམ་ཞག་འདྲ། ། འདི་སྣང་ཀུན་དོན་མེད་པ་སླུ་བྲིད་ཡིན། ། ཚེ་ཕྱི་མར་ཕན་པ་གཞན་མེད་པས། ། རང་ནུས་པ་གང་ཡོད་དགེ་ལ་སྦྱོར། ། ཆོས་ཟབ་མོར་གྲགས་པ་མང་ན་ཡང་། ། དམ་ཚིག་དང་སྡོམ་པ་བསྲུང་བ་འདི། ། དུས་གསུམ་གྱི་རྒྱལ་བ་དགྱེས་བྱེད་དང་། ། གཏན་འདུན་གྱི་སྒྲུབ་པའི་ཡང་རྩེ་ཡིན། ། བསྟེན་ན་ནི་དགེ་བའི་བཤེས་གཉེན་བསྟེན། །་བསམ་ན་ནི་དཀར་ནག་ལས་འབྲས་སོམས། །བྱེད་ན་ནི་དམ་པའི་ལྷ་ཆོས་གྱིས། ། དུས་ནམ་ཡང་བསླུབ་མེད་དོ་ཀྱེ། ། ཆོས་ཟབ་མོ་གླུ་རུ་བླངས་པ་ཡི། ། གཏམ་ཚིག་གསུམ་སྨྲས་བའི་དགེ་བ་འདིས། ། བློ་དམ་པའི་ཆོས་ལ་ཕྱོགས་པ་ཡི། ། ལམ་གེགས་མེད་འགྲོད་པ་མཐར་ཕྱིན་ཤོག ། མགོན་ཐུགས་རྗེའི་གཏེར་ཆེན་སྤྱན་རས་གཟིགས། ། བོད་པུར་རྒྱལ་འདྲེན་པདཀོན་མཆོག་འབངས། ། དུས་ད་ལྟ་འཇམ་དབྱངས་བཞད་པའི་སྡེ། ། ལྷ་བླ་མ་དབྱེར་མེད་ཐུགས་རྗེས་གཟིགས། །བོད་ཆེན་པོ་བྱང་གི་ཕྱོགས་མཐའ་འདིར། ། མ་འགྲོ་བའི་བདེ་སྐྱིད་བསྟན་ལ་རག ། ཆོས་བསྟན་པའི་འཕལ་རྒྱས་ཁྱེད་ཀྱི་དྲིན། ། འདི་བསམ་ཞིང་བཀའ་དྲིན་སྙིང་ནས་དྲན། ། སྔོན་བླ་མ་དྲི་མ་མེད་པ་དང་། ། མ་མཁའ་འགྲོ་གསང་བ་ཡེ་ཤེས་སོགས། ། ཡོངས་གནས་གསུམ་གྱི་དཔའ་བོ་དཔའ་མོ་ཀུན། ། མགྲིན་གཅིག་གིས་ལུང་བསྟན་ཇི་ལྟར་མཛད། ། ཀྱེེ་གངས་རིའི་མགོན་པོ་སྤྱན་རས་གཟིགས། ། གནས་དེ་ན་ཁྱོད་ཀྱི་ཞིང་ཁམས་ཡོད། ། ཞིང་དེ་ན་ཁྱོད་ཀྱི་གདུལ་བྱ་ཡོད། ། ཅེས་ལུང་བསྟན་གྱི་གདུལ་བྱའི་དུས་ལ་བབས། ། ཆེས་སྙིགས་མ་ལྔ་བདོའི་དུས་ངན་དང་། ། ལས་སྡིག་ལ་སྤྱོདཔའི་ཡུལ་མཐའ་འདིར། ། ལྷ་སྙིང་རྗེའི་གཏེར་ཆེན་ཁྱོད་མིན་པ། ། ང་ཉམ་ཐག་གི་མགོན་སྐྱབས་སུ་ལ་ཞུ། ། ཆོས་མདོསྔགས་བསྟན་པ་ཉི་རྒས་འདྲ། ། དེ་བཤད་སྒྲུབ་ཀྱིས་འཛིན་པའི་བསྟན་འཛིན་དཀོན། ། ཆོས་ཚུལ་བཞིན་སྒྲུབ་ལ་དགྲ་བོ་མང་། ། དུསསྙིགས་མའི་རང་མཚང་མཚོ་ལྟར་རྡོལ། ། འདི་བསམས་ན་ཤེས་པ་གྱ་ཏིང་ནས་སྐྱེ། །་སེམས་སྐྱོ་ཡང་ལས་ངན་སྒྲོག་གིས་བཅིངས། ། ང་གདུངས་པའི་འོ་དོད་རྒྱང་ནས་འབོད། ། ལྷ་ཐུགས་རྗེ་ཆེན་པོས་གསན་ལགས་སམ། ། སྒོས་ཚེ་ཐུང་ནམ་འཆི་ཆ་མེད་ལ། ། ཉིན་དེ་རིང་ཡན་ཆད་གདོན་གྱིས་སྨྱོས། ། ལས་དོན་མེད་སྡིག་པས་རང་རང་ཕུང་། ། ད་འགྱོད་ཀྱང་འགྱོད་པ་འཕྱིས་ནས་གདའ། ། མི་རྒན་གཞོན་མེད་པར་འཆི་བ་ལ། ། ཁྱད་མེད་པ་རང་གིས་མངོན་སུམ་མཐོང་། ། ད་རང་རང་དེ་ལྟར་གློ་བུར་དུ། ། འཆི་མི་དགོས་བློ་རྩེ་ཅི་ཞིག་ཡོད། ། རི་ལུང་པ་གསེར་གྱིས་བཀང་ན་ཡང་། ། རང་འཆི་དུས་རྡུལ་ཙམ་འཁྱེར་དབང་མེད། ། གཟུངས་ཡིག་དྲུག་ཚར་གཅིག་བཏོན་ན་ཡང་། ། དེ་འཇིག་རྟེན་ཕྱི་མའི་ལམ་རྒྱག་ཡིན། ། ཆོས་གཅིག་ལ་བྱིན་རླབས་ཆེ་བ་དེ། ། སྔགས་གཟུངས་མཆོག་ཡི་གེ་དྲུག་མ་ཡིན། ། ཁོང་བྱིས་པ་ཚུན་ཆད་ཤེས་པ་དེ། ། ངེད་བོད་ཀྱི་ཆོས་སྐལ་ཡིན་པའི་རྟགས། ། མི་སྡིག་ཅན་བཙན་ཐབས་འཆང་རྒྱའི་ཆོས། །དཀོར་བག་ཆགས་ངན་པ་སྦྱོང་བ་ལ། ། ཆེས་ཟབ་པའི་མཐར་ཐུག་སྨྱུང་གནས་ཡིན། ། འདིའི་ཕན་ཡོན་ནམ་མཁའི་མཐའ་དང་མཉམ། ། དུས་དེང་སང་ངན་ལ་མགོ་མཐོ་ཡང་། ། ལམ་བར་དོའི་འཕྲང་རིང་བརྒལ་བའི་ཉིན། ། དགྲ་གཤིན་རྗེའི་དམག་གིས་བསྐོར་བའི་ཚེ། ། ཆོས་ཚུལ་བཞིན་བྱས་པའི་མི་དེ་སྐྱིད། །འཕྲང་ཡ་ངའི་འཇིགས་པ་སེལ་འདོད་ཅིང་། ། མར་ངན་སོང་གི་སྐྱེ་སྒོ་གཅོད་འདོད་ན། ། ལྷ་ཐུགས་རྗེ་ཆེན་པོའི་ཞབས་ལ་འཇུག ། དུས་ཉིན་མཚན་མེད་པར་གསོལ་བ་ཐོབ། ། ཡར་མཐོ་རིས་ཐར་པའི་གོ་འཕང་དང་། ། མར་ངན་སོང་གསུམ་པོ་གང་དུ་འགྲོ ། དུས་ད་ལྟའང་མ་ཁ་རང་གི་ལག ། མཚམས་འདི་ལས་འདས་ན་ཐར་བ་དཀའ། ། ཁོ་འཆི་བདག་བདུད་ཀྱིས་ཁྲིད་པའི་སྐབས། ། མིང་གོ་ས་དཔའ་རྩལ་སྟོབས་འབྱོར་སོགས། ། རྒྱ་ཅི་ཙམ་ཆེ་ཡང་ཕན་པ་མེད། ། ཕན་ངེས་པ་དམ་པའི་ལྷ་ཆོས་ཡིན། ། ནོར་ལོངས་སྤྱོད་སྦྲང་མའི་སྦྲང་རྩི་འདྲ། ། སྡིག་རང་གིས་བསགས་ཀྱང་གཞན་གྱིས་སྤྱོད། ། གཉེན་མཛའ་བཤེས་ཚོང་འདུས་མགྲོན་པོ་འདྲ། ། དུས་རིང་པོ་མི་སྡོད་གྱེས་ནས་འགྲོ། ། གཟུགས་ལང་ཚོ་སྟོན་ཀའི་མེ་ཏོག་འདྲ། ། ཞག་རེ་རེ་བཞིན་དུ་རིམ་གྱིས་ཡལ། ། ལས་སྐྱིད་སྡུག་ཐག་མཁན་རྐང་སྟབས་འདྲ། །གང་དར་བའི་ཐ་མ་རྒུད་པ་ཡིན། ། གནས་འཁོརབ་འདིའི་ཕུན་ཚོགས་ལ། ། མཐར་མི་བསླུ་བྱ་བ་གཅིག་ཀྱང་མེད།།དེ་སོམས་ལ་དམ་པའི་ལྷ་ཆོས་གྱིས། ། ཆོས་ཟབ་མོ་འཕགས་པའི་བསྒོམ་བཟླས་གྱིས། ། དུས་ནམ་ཞིག་བེམ་རིག་བྲལ་བའི་ཉིན། ། ལྷ་ཐུགས་རྗེ་ཆེན་པོས་ཞལ་བསྟན་ནས། ། བུ་བདེ་བ་ཅན་དུ་ཤོག་ཅིག་ཅེས། ། མགོན་འོད་དཔག་མེད་ཀྱི་དྲུང་དུ་འཁྲིད། ། དོན་དེ་ཕྱིར་སྒོ་གསུམ་དགེ་ལ་འབད། ། དགེ་གང་བསགས་དེ་ཡི་དོན་དུ་སྔོས། ། དེ་བྱས་ན་མི་ལུས་དོན་དང་ལྡན། ། ཆོས་བསྟན་དང་མཇལ་བའི་དགོས་པ་འགྲུབ། ། ཚུལ་དེ་ལྟར་སྨྲས་བའི་དགེ་བས་ཀྱང་། ། ངེད་ཡོན་མཆོད་བློ་སྣ་ཆོས་ལ་བསྒྱུར། ། ལས་དཀར་པོ་དགེ་ལ་རྟག་སྦྱང་ནས། ། མཆོག་ཐར་བའི་གོ་འཕང་མྱུར་ཐོབ་ཤོག ། 
         ཀེང་རུས་གཅལ་བཀྲམ་འཇིགས་པའི་དུར་ཁྲོད་དང་། ། ཁང་བཟང་ཉམས་དགའ་འབྱོར་པས་བརྒྱན་པ་གཉིས། ། གང་ནས་བལྟས་ཀྱང་ཆགས་བྲལ་རྒྱུར་མཚུངས་ཀྱང་། ། ངང་པ་འདམ་ལ་སྲེད་བཞིན་རྨོངས་པས་བསླུས། །ཅང་ཤེས་རྟ་དང་གླང་པོ་གསེར་དངུལ་དར། ། ཆང་དང་བུར་མ་བཟའ་བཅའ་བཏུང་བ་སོགས། ། ཇིང་གིར་རྒྱལ་པོའི་འབྱོར་པ་ལ་འཁུ་ཡང་། ། ཉིང་དགོས་སྙིང་པོ་ཏིལ་འབྲུ་ཙམ་ཡང་མེད། ། ཏིང་ཏིང་ཤག་གི་སྒྲར་བཅས་རི་སུལ་ལམ། ། ཐང་སྟོང་ཡངས་པོར་བག་ཕེབས་རྒྱུ་བྱེད་ཅིང་། ། དེང་ནི་ཤི་ཡང་འགྱོད་པ་མེད་སྙམ་དུ། །ནང་ནས་དགའ་བ་རྒྱས་དེ་སྐྱིད་པའི་མཆོག ། པང་ན་གནས་པའི་ནོར་བུ་རིན་ཆེན་ཡང་། ། ཕང་པ་མེད་བར་སྦྱིན་པར་བཏང་བྱས་ཏེ། ། བང་མཛོད་མཐའ་དག་སྟོང་པར་བྱེད་ནུས་ན། ། མང་པོས་འཕྱ་།ཡང་རང་དོན་འགྲུབ་པ་ཡིན། ། ཙོང་ཁ་པ་ཡི་རིང་ལུགས་དྲི་མ་མེད། ། ཚང་ལ་མ་ནོར་འདི་འདྲར་མཇལ་དུས་སུ། ། མཛངས་བླུན་དབྱེ་བ་ཤན་འབྱེད་དུས་ཡིན་པས། ། ཕ་ཝང་བཞིན་དུ་རང་མགོ་མ་སྐོར་ཅིག ། ཞིང་ས་གཤིན་པོར་ས་བོན་བཏབ་པ་བཞིན། ། ཟང་ཟིང་དངོས་པོ་དཀོན་མཆོག་མཆོད་བར་ཕུལ། ། འོང་བར་ངེས་པ་འཆི་བའི་དགྲ་ཡིན་པ། ། ཡང་ཡང་བསམས་ཏེ་ཕྱི་མའི་སོ་ཚིས་མཛོད། ། རང་ཉིད་རང་ལ་ཤིན་ཏུ་གཅེས་ན་ཡང་། ། ལང་ཤོར་བློ་ངན་འདི་ཡིས་ཕུང་དུ་འཇུག ། ཤིང་ལྟར་གྱོང་བའི་ཤེས་རྒྱུད་འདི་བཏུལ་ན། ། སངས་རྒྱས་གོ་འཕང་དེ་ཡང་ཐག་མི་རིང་། ། ཧང་འགྲོ་ཙམ་གྱི་ཀ་མད་སུམ་ཅུ་ལ། ། ཨང་ཡིག་སྲོག་ཏུ་ཞུགས་པའི་གླུ་ཆུང་འདི། ། ཡིད་དགའ་ཆོས་འཛིན་དབེན་པའི་རི་སུལ་ནས། ། དཀོན་མཆོག་བསྟན་པའི་སྒྲོན་མེས་གླུ་རུ་བླངས། ། ཀ་ཡེ་གཞུང་ལུགས་མང་དུ་ཐོས་ན་ཡང་། ། ཁ་བཤད་སྐམ་པོ་ཆུ་ནང་རྡོབ་བཞིན། ། ག་ལེར་རང་གི་རྒྱུད་ལ་མ་སྦྱར་བས། ། ང་ནི་འགྱོད་དེ་རང་ལ་ལེ་ཞིག་བདའ། ། ཅ་རི་ས་བཞིན་དུ་ཁ་འཁུམ་ལག་འཁུམ་ཞིང་། ། ཆ་རྒྱུས་ཡོད་མེད་ཀུན་ལ་གཞོག་སློང་གིས། ། ཇ་མར་རྩམ་སོགས་ཇི་ཙམ་འོངས་ན་ཡང་། ། ཉ་ལྟར་ལྟོགས་པའི་སེམས་འདི་བརྒྱག་དུས་མེད། ། ཏཱ་རས་གསེར་དངུལ་གོས་དར་རྟ་དང་ནོར། ། ཐ་ན་དུང་རྩེ་རྡོག་གཅིག་ཡན་ཆད་ཀྱང་། ། ད་ལྟ་གསོག་དུས་དགོས་དགོས་འདྲ་བ་ལ། ། ན་འཆིས་བཅོམ་ཉིན་ཕན་པ་སྤུ་ཙམ་མེད། ། པ་ཏྲ་ལྟར་འཁྱོག་འདི་སྣང་བྱ་བྱེད་ཀྱི། ། ཕ་མཐར་མི་ཕྱིན་དལ་འབྱོར་སྟོང་པར་ཟད། ། བ་ལང་རྟེན་དང་ཁྱད་པར་མ་དོད་ན། ། མ་ལ་བུ་སྐྱེས་དགོས་པ་མ་བྱུང་ངོ། ། ཙ་ཏུར་ལུས་ཀྱི་འབྱུང་བ་ཆ་སྙོམས་ཤིང་། ། ཚ་རྐྱེན་གྲང་རྐྱེན་ཐུབ་བའི་གནས་སྐབས་དེར། ། ཛ་ཡའི་བཀའ་བཞིན་དམ་ཆོས་མ་བསྒྲུབས་པས། ། ཝ་ལེར་ལུས་སེམས་གཉིས་པོ་འགྲིབ་ནས་ཐལ། ། ཞྭ་སེར་བསྟན་པ་ཉམས་བའི་ཐན་ལྟས་སུ། ། ཟ་ཆོག་མཁན་པོ་ང་དང་ང་འདྲརཡང་། ། འ་འུར་གྲགས་བས་མི་རྣམས་སྐྱབས་འཚོལ་ཏེ། ། ཡ་རེ་ང་འོ་མཛོ་སྦྲེལ་གཡང་བསྐྱུར་འདྲ། ། རྭ་གདེངས་གཤིན་རྗེའི་རྒྱལ་པོ་མ་རྒས་ཤིང་། ། ལ་ལུང་མྱུལ་བའི་ཕོ་ཉ་གྲངས་མང་ལ། ། ཤ་ཟ་མ་མོའི་གནོད་པ་མཐུ་ཆེ་བས། ། ས་སྟེང་ཡུན་རིང་སྡོད་པའི་རེ་བ་མེད། ། ཧ་ཅང་རྟག་འཛིན་མ་ཆེ་བློ་སྣ་བསྟུངས། ། ཨ་ཧོ་ཨ་ཧོ་ངེས་པར་འཕྱིས་འདུག་གོ ། གླུ་རྟ་ཁ་ལ་མ་གྱེར་སེམས་ལ་ཟུངས། ། རང་ལྕག་རང་གིས་བྲོ་བ་ལ་སྙིང་ཕུར་ཚུགས། ། ཀ་ཡེ་དམ་པ་རྣམས་ནི་ཞི་བར་གཤེགས། ། ཁ་ལྟ་གྲོགས་མཆེད་ཕལ་ཆེར་འདས་ན་ཡང་། ། ག་ལེ་སོས་བདེར་སྡོད་པའི་མདོ་མེད་པོ། ། ང་ནི་རང་གིས་རང་ལ་གྲོས་ཤིག་འདེབས། ། ཅ་ཅོ་དོན་མེད་གཏམ་གྱིས་སེམས་རྩ་དཀྲུགས། ། ཆ་བྱད་མཚར་དགུའི་བསླུ་བྲིད་སྲེད་པས་བཅིངས། ། ཇ་སོགས་འདོད་ཡོན་རྗེས་སུ་རྒྱུག་པ་ཡི། ། ཉ་མོ་འཆི་བདག་ལྕགས་ཀྱུས་ཟིན་ལ་ཉེ། ། ཏ་ལའི་འདབ་ལྟར་རྒྱས་པའི་དཔལ་འབྱོར་ཀྱང་། ། ཐ་མར་དྲན་པའི་ཡུལ་དུ་བསྐྱུར་ནས་འགྲོ ། ད་ལྟ་དབྱེར་མེད་ལྟ་བུའི་ལུས་སེམས་ཀྱང་། ། ན་རྒ་འཆི་བའི་དབྱེན་གྱིས་སོ་སོར་འབྱེད། ། པ་ཏྲའི་མཇུག་ལྡན་གནས་འདྲ་འཁོར་བའི་མཚོ། ། མཐའ་མི་མངོན་སྡུག་བསྔལ་བ་རྒྱས་གང་བར། ། བ་སྤུ་ཙམ་ཡང་མི་གཡོ་སྙིང་ཁམ་ཅན། ། མ་རིག་གདོན་གྱིས་མྱོས་ཏེ་ཧ་ཅང་འཁྲུལ། ། རྩ་སྔོན་བ་མོས་རེག་པའི་གྲང་ཉམས་དང་། ། ཚ་བའི་ཆུ་ཐིགས་ཕོག་པ་མི་བཟོད་དེ། ། ཛ་ཞེས་འགུག་བྱེད་ལས་ཀྱི་ལྕགས་ཀྱུ་ཡིས། ། ཝ་ལེ་དམྱལ་བའི་མེ་ནང་འཁྲིད་ཀྱིས་དོགས། ། ཞ་འཐེང་འོན་ལོང་བདེ་སྡུག་ལོངས་སྤྱོད་དང་། ། ཟ་མ་མ་ནིང་ཕོ་མོའི་རྟེན་ལ་སོགས། ། འ་ཅག་འདོད་དང་མི་འདོད་དབང་ན་མེད། ། ཡ་མཚན་བཀོད་པ་ལས་ཀྱིས་བྱས་ནས་འགྲོ། ། ར་བར་ཆུད་པ་བཤན་པའི་ལུག་བཞིན་དུ། ། ལ་འུར་གཤེད་མས་ནམ་འཛིན་ཆ་མེད་པས། ། ཤ་ཁྲག་གདོས་བཅས་ལུས་འདི་དོར་བའི་ཚེ། ། ས་འོག་མུན་པརམི་ལྟུང་ཐབས་ཤིག་མཛོད། ། ཧ་ཧ་ཁ་བཤད་མཁས་ལ་བསམ་བརླག་ཁྱོད། ། ཨ་ཧོ་བསམ་བཞིན་རང་ཉིད་མི་བརླག་ན། ། ཧ་ལའི་དུག་མཚུངས་སྲིད་དང་དམ་ཆོས་ཀྱི། ། ཨ་མྲྀ་ཏ་གཉིས་མ་ནོར་མ་བསྲེ་ཞིག ། ཨ་ཨཱ་དལ་འབྱོར་རྟེན་བཟང་ལན་གཅིག་ཐོབ་པ་འདི་ངོ་མཚར། ། ཨི་ཨཱི་འདི་ནས་ལྷུང་ན་འགྲོ་ས་ངན་སོང་རང་ཡིན་ནོ ། ཨཱ་ཨཱུ་མ་ཀིར་ལྷུང་ཕྱིན་ཐར་པའི་དུས་ཚོད་ཅིག་མེད་དོ། ། རཱྀ་རྀ་མེ་རི་འབར་བའི་སྦུབས་དེར་ཅི་འདྲ་བྱས་སྡོད་པ། ལྀ་ལཱྀ་ལས་ངན་ལུས་ལ་སྨིན་ན་བྱ་ཐབས་དང་བྲལ་ལོ། ། ཨེ་ཨཻ་གནས་དེར་མི་ལྟུང་ཐབས་ཤིག་ད་ལན་རང་བྱེད་དགོས། ། ཨོ་ཨཽ་ཐབས་ཤིག་བྱེད་ན་སྐྱབས་འགྲོ་ལས་འབྲས་རང་ཡིན་ནོ། ། ཨ༚་ཨ༚་བསམ་བློ་གཏོང་སའི་འགག་མདོ་འདི་ཀ་རང་རེད་ཨཿ ཀེ་ལ་ཤ་འམ་རྫ་རི་སྨུག་པོ་ཡི་མགུལ་དུ། ། ཁེ་འདོད་གྲགས་འདོད་མེད་པ་རི་དྭགས་ཀྱི་བུ་བཞིན། ། གསེར་དྲི་བསུང་འཐུལ་བའི་རྫི་ངད་ལ་སྣོམས་ཤིང་། ། དེ་རང་གཅིག་པུར་བག་ཡངས་རྒྱུ་བ་ཞིག་བྱུང་ན། ། ཅེ་སྤྱང་བཞིན་དུ་ཟས་ཀྱིས་གདུངས་པ་འདི་སྤངས་ཤིང་། ། ཆེ་མཐོའི་ཆ་ལུགས་སྡེ་དཔོན་སྤྱོད་ཚུལ་འདི་དོར་ཏེ། ། ཇེ་རིང་ཇེ་རིང་དབེན་པའི་ས་མཐའ་རུ་ཕྱིན་ནས། ། ཉེ་དུ་མཛའ་བཤེས་འབྲེལ་ཐག་ཆད་བ་ཞིག་བྱུང་ན། ། ཏེ་ལོ་ནཱ་རོའི་རྣམ་ཐར་འཁྱོང་བ་རུ་དཀའ་ཡང་། ། ཐེ་གཏོགས་གྲོས་བསྡུར་མཛའ་བའི་བྱ་བྱེད་འདི་བཞག་ནས། །དེ་ན་འདི་ན་མེད་པ་སྐྱི་བསེར་གྱི་རླུང་བཞིན། ། ནེའུ་གསིང་སྤང་ལྗོངས་གང་དགར་མྱུལ་བ་ཞིག་བྱུང་ན། ། པེ་ཧརདཀོར་མཛོད་བསྲུང་དྲའི་གཉེར་ཁ་ཡང་མ་དགོས། ། ཕེ་ར་ཕྱག་པའི་ཁྲིམས་དཔོན་སྤྱོད་པ་ཡང་མ་དགོས། ། བེའུ་ལུག་ཚུན་ཆད་པར་བརླག་དོགས་པ་ཡང་མ་དགོས། ། མེ་ཆུ་ཤིང་གསུམ་འཛོམ་པས་ཅོག་པ་ཞིག་བྱུང་ན། ། ཙེ་ནེ་ལངས་པ་ཁོ་ནས་གཞིས་རྫོགས་ཀྱི་འགྲོ་བདེ། ། ཚེ་འདི་གང་སྐྱིད་ཕ་ཡུལ་བྱེད་པ་ཡི་འདུག་བདེ། ། ཛེ་རེག་ཕོག་ཐུག་མེད་པར་ཀུན་སྙོམས་ཀྱི་འགྲོགས་བདེ། ། ཝེ་ལྟར་གར་ཡིབ་མི་ཤེས་སྟབས་བདེ་ཞིག་བྱུང་ན། ། ཞེ་ས་ངོ་འཛིན་དགོས་པའི་དཔོན་པོ་ཡང་མེད་ལ། ། ཟེ་བ་ཡར་འཐེན་དགོས་པའི་གཡོག་པ་ཡང་མེད་ཅིང་། ། འེ་གནོད་དོགས་པ་དགོས་པའི་དགྲ་བོ་ཡང་མེད་པར། ། ཡེ་ཤེས་ལྷ་ཚོགས་ཁོ་ནར་བསྟེན་པ་ཞིག་བྱུང་ན། ། རེ་ཐག་བཅད་པའི་མངའ་ཐང་རྒྱང་སྐྱུར་དུ་བྱས་ལ། ། ལེ་ལོ་སྤངས་པའི་དམ་ཆོས་རྣལ་མ་ཞིག་བྱས་ཏེ། ། ཤེས་རབ་ཐབས་ཀྱིས་ཟིན་པ་རྒྱལ་སྲས་ཀྱི་སྤྱོད་པས། ། སེམས་ཅན་ཀུན་ལ་ཕན་པ་བསྒྲུབ་ནུས་ཤིག་བྱུང་ན། །ཧེ་ཧེ་ཡིད་སྨོན་ལྟར་གྱི་སྐལ་བ་ཞིག་ཡོད་ན། ། ཨེ་མ་དེ་ལས་ལྷག་བའི་དགའ་རྒྱུ་ཞིག་ཅི་ཡོད། ། ཨེ་ཀྱཻ་དགའ་བ་ཆེན་པོའི་གླུ་དབྱངས་ཤིག་བླངས་ཏེ། ། ཨེ་ཝ༚་ཟུང་འཇུག་ས་ལ་བྲོ་བརྡུང་ཞིག་བྱའོ། ། རྗེ་བཙུན་བླ་མ་རྣམས་ལ་ཕྱག་འཚལ་ལོ། ། སྐྱབས་གནས་ཀུན་ལ གུས་པས་ཕྱག་བྱས་ནས། ། གཞུང་ལུགས་ཀུན་ལ་ཐོས་བསམ་བྱས་པའི་དོན། ། ཉམས་ལེན་ཀུན་ལ་ཇི་ལྟར་སློབ་པའི་ཚུལ། ། རང་གཞན་ཀུན་ལ་ཕར་ཕྱིན་མདོ་ཙམ་སྤེལ། ། ལེགས་ཚོགས་ཀུན་གྱི་རྩ་བ་བླ་མ་སྟེ། ། ཡོན་ཏན་ཀུན་གྱི་གཞི་རྟེན་ཚུལ་ཁྲིམས་དང་། ། དངོས་གྲུབ་ཀུན་གྱི་རྩ་བ་དམ་ཚིག་ཡིན། ། གཏན་བདེའི་རྩ་བ་འཛུག་ན་དེ་ལ་དགོངས། ། བྱ་བ་ཀུན་ལ་ལས་འབྲས་དབང་པོར་ཞིག ། རེ་དོགས་ཀུན་ལ་ལྟོས་མེད་ཐོག་རྫིངས་ཐོངས། ། སྐྱིད་སྡུག་ཀུན་ལ་ལམ་གྱི་བོགས་འབྱིན་བཅོལ། ། སྒྲུབ་ཚུགས་མཐའ་རུ་སྐྱོལ་ན་དེ་ལ་དགོངས། ། འདོད་ཡོན་ཀུན་ལ་བདུད་ཀྱི་གཡབ་མོར་ཟུངས། ། སྙན་གྲགས་ཀུན་ལ་བྲག་ཅའི་གདངས་སུ་སོམས། ། གཉེན་བཤེས་ཀུན་ལ་ཚོང་འདུས་མགྲོན་པོར་ལྟོས། ། ཆོས་བརྒྱད་འཁྲི་བ་གཅོད་ན་དེ་ལ་དགོངས། ། སྡིག་ལྟུང་ཀུན་ལ་འོག་བའི་ནད་བཞིན་འཛེམ། ། དགེ་ཚོགས་ཀུན་ལ་བྲེགསོག་ཕུལ་གསོག་མཛོད། ། སྤྱོད་ལམ་ཀུན་ལ་དྲན་ཤེས་བག་ཡོད་སྟེན། ། བླང་དོར་ཚུལ་བཞིན་སྒྲུབ་ན་དེ་ལ་དགོངས། ། ཆོས་མཛད་ཀུན་ལ་མོས་གུས་དག་སྣང་སྦྱོངས། ། གསུང་རབ་ཀུན་ལ་བག་ཆགས་ཅི་ཐེབས་དང་། ། འཇུག་ལྡོག་ཀུན་ལ་རིགས་པས་ཞིབ་མོར་དཔྱོད། ། ཉེས་སྤྱོད་སྒོ་མོ་འགོག་ན་དེ་ལ་དགོངས། ། སྲིད་འབྱོར་ཀུན་ལ་ཞེན་ལོག་ངེས་འབྱུང་དང་། ། འགྲོ་བ་ཀུན་ལ་རྗེས་ཆགས་བྱང་ཆུབ་སེམས། ། འཁོར་འདས་ཀུན་ལ་ཞེན་བྲལ་ལྟ་བ་སྟེ། ། ཉམས་ལེན་སྙིང་པོར་དྲིལ་ན་དེ་ལ་དགོངས། ། མདོར་ན་ཐོས་དོན་བསྒྲུབས་དེ་མཁས་པ་ཡིན། ། བླང་དོར་ངོ་ལྐོག་མེད་ན་བཙུན་པ་ཡིན། ། ཉོན་མོངས་གདེན་གསུམ་ཐུལ་ན་གྲུབ་ཐོབ་ཡིན། ། མཁས་བཙུན་བཟང་གསུམ་འདོད་ན་དེ་ལ་དགོངས། ། མང་དུ་ཐོས་ཀྱང་ཉོན་མོངས་གཉེན་པོ་རུ། ། མ་སོང་བྲོ་བའི་གླུ་བཞིན་དོན་མེད་པས། ། གང་ཤེས་མཐའ་དག་རང་རྒྱུད་འདུལ་བྱེད་དུ། ། སྦྱོར་བར་ཕྱེད་པ་གདམས་པའི་རྒྱལ་པོར་ཟུངས། ། དེ་སྐད་གཏམ་དུ་བྱས་པའི་དགེ་བའི་མཐུས། ། རང་གཞན་ཀུན་གྱི་བློ་སྣ་ཆོས་སུ་འཁུལ། ། སྤོང་བ་བསམ་གཏན་འཁོར་ལོ་མཐར་ཕྱིན་ཏེ། ། མཁའ་མཉམ་ལུས་ཅན་ཡོངས་ཀྱི་དོན་བྱེད་ཤོག །
          རྗེ་བཙུན་བླ་མ་རྣམས་ལ་ཕྱག་འཚལ་ལོ། ། ལེགས་ཚོགས་རྟེན་འབྲེལ་ཀུན་གྱི་སྒོ་གཅིག་པུ། ། བཤེས་གཉེན་དམ་པ་ཚུལ་བཞིན་བསྟེན་བྱེད་ཅིང་། ། དལ་འབྱོར་རྙེད་དཀའ་འཇིག་པར་སླ་བའི་ཚུལ། ། བསམས་ཏེ་བློ་སྣ་ཆོས་སུ་བསྒྱུརབར་བྱ། ། ཤི་ནས་ངན་འགྲོར་མི་སྐྱེའི་གདེང་མེད་པས། ། སྐྱབསའགྲོ་ལས་འབྲས་བླང་དོར་ལ་འབད་ཅིང་། ། སྲིད་ལས་ངེས་འབྱུང་རྣམ་དག་བསླབ་གསུམ་གྱིས། ། སྡུག་བསྔལ་འཁོར་པའི་རྒྱུན་ལམ་བཅད་པར་བྱ། ། མ་རྣམས་གཅེས་འཛིན་སྙིང་རྗེའི་སེམས་མཆོག་གིས། ། རླབས་ཆེན་རྒྱལ་སྲསསྤྱོད་པའི་གཞུང་བསྲངས་ཤིང་། ། བསྟན་པའི་སྙིང་པོ་མཐའ་བྲལ་སྟོང་པ་ཉིད། ། ཀླུ་སྒྲུབ་དགོངས་པ་ཇི་བཞིན་བཙལ་བར་བྱ། ། སྔོན་འགྲོ་ཐུན་མོང་ལམ་གྱིས་རྒྱུད་སྦྱངས་ཏེ། ། འཇུག་སྒོ་རྣམ་དག་དབང་གིས་སྨིན་བྱས་ནས། ། དངོས་གྲུབ་གཉིས་ཀྱི་གཏེར་གྱུར་དམ་ཚིག་སྡོམ། ། མིག་གི་འབྲས་བུ་ཇི་བཞིན་བསྲུང་བར་བྱ། ། རྒྱུད་སྡེ་གཞན་གསུམ་གདམས་པར་ཤར་བ་ཡིས། ། བླ་མེད་ལམ་ལ་ངེས་པ་མཆོག་རྙེད་ནས། ། བསྐྱེད་རིམ་ཕྲ་རགས་རྣལ་འབྱོར་ལེགས་བསྒོམས་ཏེ། ། སྐྱེ་ཤི་བར་དོའི་འཕྲང་ལས་ཐར་བར་བྱ། ། ལུས་དབེན་སྐུ་ཡི་རྡོ་རྗེའི་ཏིང་འཛིན་གཞིར། ། རླུང་སྔགས་མཉམ་སྦྱོར་རྡོ་རྗེ་བཟླས་པའི་མཐུས། ། དབུ་མར་ཞུགས་གནས་ཐིམ་པ་ལས་བྱུང་བའི། ། དགའ་བཞིའི་ལམ་གྱིས་འོད་གསལ་འདྲེནཔར་བྱ། ། དེ་ཡི་ངང་ལས་སྒྱུ་མའི་སྐུར་བཞེངས་ཏེ། ། དེ་ཉིད་ཡང་ཡང་སྟོང་པར་བཅུག་པ་ཡིས། ། དོན་དམ་འོད་གསལ་ཡེ་ཤེས་མངོན་གྱུར་ཏེ། ། སྲིད་པའི་རྩ་བ་དྲུངས་ནས་འབྱིན་པར་བྱ། ། དག་ཅིང་འོད་གསལ་ཐུགས་ཀྱི་མཁའདབྱིངས་ལས། ། གང་འདུལ་གཟུགས་སྐུའི་སྣང་བ་འཇའ་ཚོན་བཞིན། ། འགོག་མེད་རྟག་འཆར་སྒྱུ་འཕྲུལ་དྲ་བ་ཆེ། །ཟུང་འཇུག་གོ་འཕང་མྱུར་དུ་བསྒྲུབ་པར་བྱ། ། དེ་ལྟར་བྱས་ན་རྒྱལ་ཀུན་དགོངས་པའི་བཅུད། ། ཚང་ལ་མ་ནོར་བློ་བཟང་རྒྱལ་བསྟན་དང་། ། མཇལ་བའི་དགོས་དོན་ལག་རྩེར་སོན་པ་ཡིས། ། འགྱུར་མེད་གཏན་གྱི་རྒྱལ་ས་ཟིན་པར་ངེས། ། རང་ལ་ཉམས་མྱོང་མེད་ཀྱང་དམ་པའི་གསུང་། ། ཇི་བཞིན་ཉུང་ངུའི་ཚིག་གིས་བསྙད་པའི་དགེས། ། འཇམ་མགོན་ལུགས་བཟང་ཕྱོགས་མཐར་རྒྱས་པ་དང་། ། རང་གཞན་མཐའ་དག་སྨིན་ཅིང་གྲོལ་བར་ཤོག ། དོན་གཉིས་ཕུན་ཚོགས་འདོད་དགུའི་དཔྱིད་འཇོ་བ། ། བསླུ་མེད་སྐྱབས་ཀྱི་དམ་པ་མཆོག་གསུམ་ལ། ། གུས་པས་བཏུད་ནསལུགས་ཟུང་དང་འབྲེལ་བའི། ། བསླབ་བྱའི་སྙིང་པོ་མདོ་ཙམ་སྤེལ་བར་བྱ། ། མཆོག་འབྲིང་དམནཔའི་སྐྱེ་བོ་གང་ལ་ཡང་། ། ལས་འབྲས་བླང་དོར་ཚུལ་བཞིན་དཔྱོད་པ་ནི། ། བདེ་ལེགས་ཀུན་གྱི་རྩ་བར་འགྱུར་བའི་ཕྱིར། ། སྤང་བླང་མ་ནོར་ལག་ཏུ་ལེན་པ་གཅེས། ། ཁྱད་པར་རྣམ་གྲོལ་ཐར་པའི་གྲོང་ཁྱེར་གྱི། ། འཇུག་ངོགས་གསལ་བྱེད་ཏིང་འཛིན་ཤེས་རབ་གཉིས། ། གང་ལ་བརྟེན་པ་ལྷག་བའི་ཚུལ་ཁྲིམས་ནི། ། བཤད་སྒྲུབ་བསྟན་པ་ཀུན་གྱི་གཞི་རྟེན་ཡིན། ། ཚུལ་ཁྲིམས་རྣམ་པར་དག་པའི་དྲི་བཟང་ཅན། ། མང་ཐོས་སྦྲང་རྩིས་གཏམས་པའི་པདྨ་དེ། ། དྲེགས་ལྡན་ལྷ་བརྒྱའི་གཙུགགི་རྒྱན་འགྱུར་ཞིང་། ། ཕུན་ཚོགས་བུང་བའི་འཕྲེང་བ་ངང་གིས་འདུ། ། བླ་མ་ལྷ་ཡི་ཐུགས་རྗེ་སྤྲིན་སྔོན་ལ། ། མི་ཕྱེད་དད་པའི་མིག་ཡངས་གྱེན་དུ་གཏོད། ། བསྙེན་སྒྲུབ་ལས་ཀྱི་གར་སྟབས་སྒྱུར་བྱེད་ན། ། དོན་གཉིས་དགེ་བའིགཏོས་བཟང་འཛིན་པར་ངེས། ། སྒོ་གསུམ་སྦྱོད་པ་གང་ལ་འཇུག་པའི་ཚེ། ། སྔོན་བྱོན་དམ་པའི་རྣམ་ཐར་རྗེས་སུ་སླེབ། ། རྣམ་གཡེང་བག་མེད་བྱ་བ་རིང་སྤངས་ཚེ། ། བསྟན་འགྲོའི་དོན་ཆེན་སྒྲུབ་ལའང་དཀའ་བ་མེད། ། ཡུལ་དུས་སྐྱེ་བོའི་བློ་དང་མཐུན་འཇུག་གིས། ། ཉེ་རིང་བར་མ་ཀུན་གྱི་སེམས་གཟུང་ཞིང་། ། རང་གི་དགེ་བའི་བྱ་བ་མི་ལྷོད་པ། །གང་དེ་ལུགས་གཉིས་ཟུང་འབྲེལ་དགའ་སྟོན་ཡིན། ། ཆོས་ཀྱི་མདུན་མ་གཙོ་བོར་གྱུར་པ་ཡི། ། ཕན་པར་སྨྲ་བའི་ངག་ལས་མི་འདའ་ཞིང་། ། ཆོས་མིན་གཏམ་གྱི་རྗེས་སུ་མི་འབྲང་བའི། ། བཟང་ངན་གྲོགས་ཀྱི་འགྲོགས་ལུགས་ཤིན་ཏུ་གཅེས། ། མདོར་ན་ལྷ་ཆོས་རྩ་བ་དད་པ་ཡིན། ། མི་ཆོས་རྩ་བ་ཀུན་དང་མཐུན་པ་ཡིན། ། དངོས་གྲུབ་རྩ་བ་དམ་ཚིག་སྡོམ་པ་ཡིན། ། རྩ་བ་དེ་གསུམ་ཐུགས་ཀྱི་དཀྱིལ་དུ་ཆོངས། ། ཁྱད་པར་ཆོས་སྲིད་གཉིས་ལས་ལྷ་ཆོས་དང་། ། འདི་ཕྱི་གཉིས་ལས་ཕྱི་མ་གཙོར་བྱེད་པ། ། དེ་ཡི་བྱ་བ་གང་ལ་ཞུགས་ན་ཡང་། ། འཕྲལ་དང་ཡུན་དུ་ཕན་པ་ཁོ་ནར་འགྲོ་། དེས་ན་དམ་པ་གོང་མའི་རྣམ་ཐར་བཞིན། ། ཚུལ་གནས་ཐོས་བསམ་སྒོམ་པས་རང་རྒྱུད་བཏུལ། ། གཞན་ལའང་ཐར་པའི་བག་ཆགས་ཅི་ཐེབས་ཀྱིས། ། བསྟན་འགྲོའི་དོན་ལ་བརྩོན་པ་རྒྱུན་ཆགས་མཛོད། ། མདོར་ན་རྒྱུན་དུ་རང་གི་སྒོ་གསུམ་ལ། ། བརྟག་སྟེ་སྐད་ཅིག་ཙམ་ཡང་མི་ལྷོད་པར། ། ཉིན་མཚན་དོན་ཡོད་ཆོས་ཀྱིས་འདའ་བྱས་ན། ། ལེགས་ཚོགས་ཐམས་ཅད་ལྷུན་གྱིས་འགྲུབ་པར་འགྱུར། ། ལུགས་ཟུང་འདབ་མའི་གར་གྱིས་རོལ་པ་ཡི། །བསླབ་བྱ་མཁའ་འགྲོ་དཀར་པོའི་འཕྲེང་བ་འདིས། ། ཁྱོད་ཐུགས་མ་དྲོས་ཀླུང་དུ་རྩེན་པ་ལས། ། ལེགས་བྱས་རླབས་ཀྱི་ཁྲེང་བ་རྒྱས་གྱུར་ཅིག ། རབ་འབྱམས་རྒྱལ་བ་ཀུནགྱི་ཡེ་ཤེས་ནི། ། དུས་མཐར་ཐུབ་བསྟན་རྒྱལ་མཚན་བསྒྲེང་བའི་བྱིར། ། གསུམ་ལྡན་ངུར་སྨྲིག་འཆང་བའི་རྣམ་རོལ་བ། ། ཡབ་རྗེ་འཇིགས་མེད་དབང་པོའི་ཞབས་ལ་འདུད། ། དམ་པའི་སྐྱེས་བུ་འགའ་ཞིག་མདོ་སྔགས་ཀྱི། ། ལམ་བཟང་སྒྲུབ་ཚུལ་བསླབ་བྱ་དགོས་སོ་ཟེར། ། གཞན་ལ་ཕན་པའི་བསླབ་བྱ་བྱེད་པ་པོ། ། རང་ཉིད་བསམ་ཞིང་རང་ལ་ཡི་མུག་སྐྱེས། ། འདིཕྱིའི་སྐྱབས་སུ་བླ་མ་བསྟེན་ན་ཡང་། ། བདེན་ཁ་རང་གིས་བཟུང་བ་ཡིད་རེ་མུག ། དལ་འབྱོར་དོན་ཆེ་རྙེད་དཀའ་ཟེར་བཞིན་དུ། ། དོན་མེད་སྟོང་པར་གཟད་པ་ཡིད་རེ་མུག ། ནོར་རྐུན་མཐོང་ནས་ཤིན་ཏུ་ཟོན་བྱེད་ཀྱང་། ། མི་རྐུན་གཤིན་རྗེའི་ཟོན་མེད་ཡིད་རེ་མུག །ལྐོག་གྱུར་གནས་ལུགས་འཚོལ་བའི་ཁུལ་བྱེད་ཀྱང་། ། མངོན་གྱུར་འཆི་བ་མི་མཐོང་ཡིད་རེ་མུག ། ཉེས་སྤྱོད་ཆུ་བོ་ཐུར་དུ་རྒྱུག་བཞིན་དུ། ། བདེ་འགྲོའི་རི་རྩེར་ཕྱིན་འདོད་ཡིད་རེ་མུག ། བདེ་འགྲོར་མ་ཟད་བདེ་བ་ཅན་འདོདཀྱང་། ། དམྱལ་བའི་གཏིང་རྡོ་བྱེད་པ་ཡིད་རེ་མུག ། སྐྱིད་སྡུག་འདམ་དབང་ཡོད་ཅིང་ཤེས་བཞིན་དུ། ། ཐར་མེད་བཙོན་རར་འཇུག་པ་ཡིད་རེ་མུག ། གཞན་ལ་འདི་ཕྱིའི་སྐྱབས་འཇུག་ཁས་ལེན་ཡང་། ། རང་ཉིད་གར་འགྲོ་མེད་པ་ཡིད་རེ་མུག ། བསྟན་འཛིན་གོང་མའི་གྲལ་དུ་འཚང་ན་ཡང་། ། བསྟན་པའི་སྒོ་རུ་མ་ཆུད་ཡིད་རེ་མུག ། སྡོམ་གསུམ་ནོར་བུའི་གཏེར་ཁ་ཕྱེ་བ་ལས། ། ཉེས་ལྟུང་རྙོག་ཆུ་རྡོལ་བ་ཡིད་རེ་མུག ། གྲོལ་བ་ཐར་བ་དོན་གཉེར་ཟེར་བཞིན་དུ། ། སྲེད་མཁོས་ཕྱི་ཕྱིར་འཆིང་བ་ཡིད་རེ་མུག ། ཐར་འདོད་སྐྱེས་བུ་ཡིན་པ་གཞིར་བཞག་ལ། ། ཅི་བྱས་འཁོར་བའི་རྒྱུར་སོང་ཡིད་རེ་མུག ། མིག་རྩ་ནོར་ལ་གཏད་དེ་ཆོག་ཤེས་ཀྱི། ། གདམས་ངག་བྲོ་བའི་ཆོས་བཤད་ཡིད་རེ་མུག །དཀའ་ཚེགས་ཆེ་ལ་འདི་ཕྱི་གང་དུ་ཡང་། ། ཕན་མེད་ཤ་སྡུག་ཁྱི་སྡུག་ཡིད་རེ་མུག ། རྩེ་གཅིག་དད་པས་རྒྱུ་ནོར་བསགས་བསགས་ཀྱང་། ། འཆི་ཚེ་ཅམ་གྱིས་བསྒྱུར་དགོས་ཡིད་རེ་མུག ། འདི་བས་འདི་དགོས་མང་སྟེ་བཤོལ་བའི་འོས། ། དམ་ཆོས་གཅིག་པུར་བབ་པ་ཡིད་རེ་མུག ། བསྟན་པའི་བྱ་བར་བཏགས་ནས་སྡེ་དགོན་བསྐྱངས། ། ཆགས་སྡང་རུ་མར་སོང་བ་ཡིད་རེ་མུག ། གྲ་སློབ་སྦྱིན་བདག་ངན་པ་ཡརའཐེན་པས། ། རང་ཉིད་ཐུར་དུ་ལྕུང་བ་ཡིད་རེ་མུག ། རྒྱ་ཆེན་གཞུང་ལུགས་ལྟ་བའི་མིག་བགྲད་ནས། ། བླང་དོར་ལག་ནོམ་དགོས་པ་ཡིད་རེ་མུག ། འགྲིག་འགྲིག་ཆོས་གཏམ་བཤད་ཀྱང་སྤྱོད་ཚུལ་ལ། ། བལྟས་ཀྱིན་གྲོགས་ཀྱི་ཞེ་ཁྲེལ་ཡིད་རེ་མུག ། གཡོ་སྒྱུ་འཕྲལ་ལ་གཞན་གྱིས་མ་ཤེས་ཀྱང་། ། མཆོག་གསུམ་ཐུགས་ཁྲེལ་འབྱུང་བ་ཡིདརེ་མུག ། སྙིང་རྗེའི་ཉམས་བཏོད་རང་མཁོ་ཕུགས་སུ་བཅུག ། བྱི་ལའི་འཇམ་སྐད་འདོན་པ་ཡིད་རེ་མུག ། དགེ་སྦྱོར་བྱས་ཀྱིན་སེམས་དང་རྨི་ལྟས་ཚུན། ། ཇེ་ཐུ་ཇེ་ཐུར་འགྲོ་བ་ཡིད་རེ་མུག ། མི་ཚེ་ཆོས་ལ་བསྐྱལ་བའི་མ་ལས་ནས། ། དུད་འགྲོའི་བེམ་པོ་བྱུང་ན་ཡིད་རེ་མུག ། ད་ལྟ་གདོང་ཡོད་ཁུལ་གྱིས་སོས་བདེར་བསྡད། ། འཆི་ཁ་སྡུག་སྨྲས་ཤོར་ན་ཡིད་རེ་མུག ། མདོར་ན་འཁྲུལ་བ་མེད་པ་རྒྱལ་བའི་བཀའ། ། སྔོན་བྱོན་དམ་པའི་གསུང་དང་རྣམ་པར་ཐར། ། འཁོར་འདས་སྐྱོན་ཡོན་གང་གི་སྒོ་ནས་ཀྱང་། ། རང་གི་སེམས་ལ་བལྟས་ན་ཡིད་དེ་མུག ། འོན་ཀྱང་ཁོ་བོ་ད་ལྟ་མི་རྣམས་ཀྱིས། ། དམ་པར་བཀུར་བས་རང་རྒྱུས་ཤེས་བཞིན་དུ། ། སྟོང་འུར་ལང་བས་དམ་པའི་ཁུར་འཛིན་ཅིང་། ། དེ་ཡི་རྫུན་འགེབས་གཡོ་སྒྱུ་ཅི་ཡང་བྱས། ། རང་གི་ངང་ཚུལ་འདི་ཡིས་རྗེས་དཔག་ན། ། སྙིགས་དུས་བླ་སྤྲུལ་དགེ་བའི་བཤེས་གཉེན་དུ། ། གྲགས་པའི་ཁྲོད་ནའང་ཕྱི་ནང་གོ་འཛོལ་བ། ། ང་འདྲ་ཡོད་དམ་སྙམ་དུ་དོགས་པ་སྐྱེས། ། མཆོད་གྲལ་ལྡེར་བཟོ་ལྟ་བུའི་བླ་ཆེན་དང་། ། བཅོས་མའི་མེ་ཏོག་འདྲ་བའི་སྐུལ་སྐྱེའི་རིགས། ། མཁས་དང་གྲུབ་པའི་འབག་གྱོན་གར་མཁན་རྣམས ། ། གཞན་མགོ་འདོན་པའི་སྔོན་ལ་རང་མགོ་ཐོན། ། ངང་ཚུལ་དྲང་པོར་སྨྲས་པའི་བདེན་གཏམ་འདིས། ། མི་རྣམས་རང་སེམས་ལྟ་བའི་མིག་འདྲེན་དུ། ། སོང་སྟེ་སྐྱོན་ཡོན་བླང་དོར་ངོས་ཟིན་ནས། ། ཆོས་ལ་ཆོས་བཞིན་སྤྱོད་པའི་རྒྱུར་གྱུར་ཅིག ། ཀཱ་ཡེ་ཐར་འདོད་ཀྱི་སྐལ་ལྡན་སྐྱེས་བུ་རྣམས། ། ཁ་ཙམ་མིན་པ་ཆོས་ཤིག་བྱེད་འདོད་ན། ། ག་ལེར་ཕྱི་བཤོལ་གྱི་དབང་དུ་མ་བཏང་བར། ། ང་ཡིས་བསྒོ་བ་བཞིན་མྱུར་བར་ཉམས་སུ་ལོངས། ། ཅ་ཅོ་ལོང་གཏམ་གྱིས་ཉིན་ཞག་ཆུད་གཟོནཞིང་། ། ཆ་ལུགས་གསོག་བྲུན་གྱིས་དམ་སྡོམ་ངོ་ཚ་འདྲ་ལ། ། ཇ་སོགས་ཟས་གོས་ཀྱི་སྲེད་པས་བསླུ་ཞིང་འབྲིད། ། ཉ་ལྟོ་བ་བཞིན་དུ་འཁྲི་བ་བཅད་ན་ལེགས། ། ཏ་ཐཱ་ག་ཏ་ཡི་བསྟན་པ་ཉིན་བཞིན་འགྲིབ། ། ཐ་ཆད་སྙིགས་དུས་ཀྱི་རང་མཚང་མཚོ་ལྟར་རྡོལ། ། ད་ནི་མི་ཚེ་ཡང་ཕལ་ཆེར་སོང་ཟིན་པས། ། ན་འཆི་སམ་སླེབས་གོང་བསྒྲིམས་ཏེ་འབད་ན་ལེགས། ། པར་མི་ཏ་ཡི་གཞུང་ལ་སྦྱངས་པ་ཡང་། ། ཕ་རོལ་ཤག་འགྱེད་ཀྱི་སྦྱོར་བ་ཙམ་མིན་པར། ། བ་སྤུ་གཡོ་བ་ཡི་ངེས་འབྱུང་བྱང་སེམས་དང་། ། མ་ལུས་ཆོས་ཀུན་གྱི་དེ་ཉིད་རྟོགས་ཕྱིར་འབོད། ། རྩ་བ་ཁས་བླངས་ཀྱི་ཚུལ་ཁྲིམས་གཙང་དང་གཅིག ། ཚ་གྲང་བཀྲེས་སྐོམ་གྱི་དཀའ་སྤྱད་བཟོད་དང་གཉིས། ། ཛ་ལང་སྤངས་པ་ཡི་ཞིདུལ་སྤྱོད་དང་གསུམ། ། ཝ་ལེར་འཛོམ་པ་དེ་ཆོས་པའི་ཡང་རྩེ་ལགས། ། ཞྭ་གོས་མཚར་མཚར་འདི་སྒྱུ་མའི་སླུ་བྲིད་ཡིན། ། ཟ་འདོད་གྲོང་ཆོག་འདི་རང་གཞན་གཉིས་ཕུང་ཡིན། ། འ་འུར་གྲགས་སྐམ་འདི་བདུད་ཀྱི་ཕྱེ་གཏོར་ཡིན། །ཡ་མཚན་སྙིང་པོ་དེ་ཆོས་ལས་གཞན་ན་མེད། ། རྭ་གདེངས་འཆི་བདག་གི་ཕོ་ཉས་མ་ཟིན་གོང་། ། ལ་འུར་སྙིངསྟོབས་དང་བརྩོན་པའི་ཤུགས་བསྐྱེད་དེ། ། ཤ་ཁྲག་གདོས་བཅས་ཀྱི་དལ་འབྱོར་གཡར་པོ་འདིས། ། ས་གསུམ་རྙེད་དཀའ་ཡི་ལམ་བཟང་བསྒྲུབས་ན་ལེགས། ། ཧ་ས་བཛྲ་སོགས་དམ་པའི་མགོན་གྱིས་བཟུང་། ། ཨ་མྲྀ་ཏ་འདྲ་ཡི་གདམས་པའིབདུད་རྩི་མྱང་། ། ཕྱི་ནང་རྟེན་འབྲེལ་ཀུན་འཛོམ་པའི་དུས་ཚོད་འདིར། ། ཐར་པའི་བཙན་ས་ཞིག་ཨེ་ཟིན་འབད་པ་གཅེས། ། མདོར་ན་སྐྱིད་སྡུག་གི་འདམ་དབང་ཡོད་དུས་འདིར། ། འདུན་པ་འཕྲུག་མེད་ཅིག་དགོས་སོ་གྲོགས་པོ་དག ། གཏམ་འདི་བསྙད་པ་ལས་བྱུང་བའི་དགེ་བ་ཡང་། ། འགྲོ་ཀུན་བྱང་ཆུབ་ལ་གཞོལ་བའི་རྒྱུ་རུ་བསྔོ། ། རྗེ་བླ་མ་རྣམས་ལ་ཕྱག་འཚལ་ལོ། ། ཆོས་སྒྲུབ་པར་འདོད་ན་གཏམ་འདི་ཉོན། ། རྟེན་དལ་འབྱོར་དོན་ཆེ་རྙེད་པར་དཀའ། ། འཇིག་སླ་ཞིང་ནམ་འཇིག་ཆ་མ་མཆིས། ། ཚེ་ཕྱི་མ་ལ་ཕན་པ་ཆོས་ལས་མེད། ། འདི་གོ་བས་མི་ཆོག་ལག་ཏུ་ལོངས། ། སྔར་ལུས་རྟེན་བཟང་པོ་དོན་མེད་དུ། ། ཆུད་ཟོས་ལ་གཏང་བར་མི་འགྱོད་དམ། ། ལས་སྡིག་པ་མང་བས་ངན་འགྲོར་འགྲོ། ། དེའི་སྡུག་བསྔལ་བཟོད་དང་བཅོས་ཐབས་མེད། ། འཆོས་འདོད་ནད་ལྟ་བཅོས་སུ་ཡོད། ། འདི་སྐྱིད་སྡུག་གཉིས་ཀྱི་སོ་མཚམས་ཡིན། ། སླར་ཐར་མེད་ངན་འགྲོའི་སྒོར་འཇུག་པ། ། སྙིང་གདོན་གྱིས་བརླམས་པ་མ་ལགས་སམ། ། རང་ལས་འབྲས་ལོག་པར་མ་བསྒྲུབས་ན། ། ལྷ་དཀོན་མཆོག་གསུམ་གྱིས་མི་བསླུ་བས། ། ཅི་བྱུང་ཡང་ཁོང་ལ་བློ་སྙིང་གཏོད། ། གང་བྱེད་ཀྱང་ལས་འབྲས་དཔང་པོར་ཞོག ། རང་བསམ་བཞིན་གཡང་སར་འཕྱོང་བཞིན་དུ། ། ཡར་འཐེན་གྱི་རེ་བ་གོ་ལོག་ཡིན། ། ངེས་འབྱུང་དང་བྱང་སེམས་ལྟ་བ་གསུམ། ། འདི་གསུང་རབ་ཀུན་གྱི་སྙིང་་ཡིན། ། དུས་ད་ལན་བག་ཆགས་ཐེབས་པ་དགོས། ། མི་བསྒོམས་ཀྱང་སྨོན་ལམ་མི་འདེབས་སམ། ། བློ་ཆོས་སུ་ཕརལ་མི་འཇུག་པར། ། ཆོས་ཚུར་ལ་ཡོང་རེ་ཧམ་པ་ཆེ། ། ལེགས་ཚོགས་ཀྱིརྩ་བ་བླ་མ་ཡིན། ། ཡོན་ཏན་གྱི་གཞི་མ་ཚུལ་ཁྲིམས་ཡིན། ། དངོས་གྲུབ་ཀྱི་འབྱུང་གནས་དམ་ཚིག་ཡིན། ། ཡིན་བྱས་པས་མི་ཆོག་ཡིན་བཞིན་སྒྲུབས། ། རྐྱེན་འཛོམ་པའི་དུས་འདིར་མི་སྒྲུབ་ན། ། དགྲ་གཤིན་རྗེས་ཟིན་ཚེ་འགྱོད་ཀྱང་ཕྱིས། ། ད་བཤད་བཤད་མང་བའི་ཁ་ན་མེད། ། ཆོས་ཤེས་པ་མང་སྟེ་སྒྲུབ་པ་དཀོན། ། ཚིག་གཅིག་ཀྱང་ཉམས་སུ་བླངས་ན་ཕན། ། དོན་མ་བསྒྲུབས་མང་ཡང་དགོས་པ་མེད། ། ཆོས་ཞེས་པ་སེམས་རྒྱུད་འཆོས་པ་ཡིན། ། དེ་སོམས་ལ་བློ་སྣ་ནང་དུ་སྐོར། ། རང་ཉམས་མྱོང་མེདཔའི་ཁ་བགད་གླུས། ། གཞན་བློ་སྣ་བསྒྱུར་བ་དཀའ་མོད་ཀྱང་། ། མགོན་དམ་པའི་གསུང་སྒྲོས་བསྐྱར་བ་ཡིན། །འདིས་འགྲོ་རྒྱུད་ཆོས་ལ་འཁུལ་བར་ཤོག །

དཔྱད་གཏམ།

དཔྱད་གཏམ་སྤེལ་བ།
པར་དབང་ཡོད་ཚད་ངེད་ཙོང་ཆུའི་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག
Copyright © 2010 Tsongchu.coM All rights reserved. Powered by: Tibetitw.coM
E-mail:[email protected]  QQ:1239685970 QQ:32460212  MSN:[email protected]