ད་ལྟ་ཁྱེད་ཀྱི་གནས་ཡུལ་ནི། - ཙོང་ཆུའི་དྲ་བ། >> ཡིག་གཟུགས། >> སྨྱུག་གུའི་རྒྱུ་དང་སྨྱུག་བཟོའི་ལག་ཤེས།

སྨྱུག་གུའི་རྒྱུ་དང་སྨྱུག་བཟོའི་ལག་ཤེས།

[རྩོམ་གྱི་ཡོང་ཁུངས། བོད་ཀྱི་ལག་ཤེས་ཀུན་བཏུས་ཆེན་མོ་ལས།] [རྩོམ་པ་པོ། འཕྲིན་ལས་རྒྱལ་མཚན་སོགས།] [ཟླ་ཚེས། 11-04-27] [ཀློག་གྲངས། ]

        ༡.སྨྱུག་རྒྱུ་དང་བཟོ་ཐབས་སྐོར་བཤད་པ།
       དེ་ལ་འབྲི་སྨྱུག་འོས་པའི་སྨྱུག་མ་ངོས་འཛིན་དང་སྨྱུག་རྒྱུ་ལེགས་བཅོས་བྱ་ཐབས་ནི། སྨྱུག་མ་ལ་རིགས་མང་པོ་ཡོད་པས་སྨྱུག་གུའི་རྒྱུར་འོས་པའི་སྨྱུག་མ་ནི། ནང་དུ་སྦུ་གུ་ཕྲ་ཞིང་བཏེགས་ན་ལྕི་བ། སྡོང་པོ་ཆེར་སྐྱེས་པའི་སྨྱུག་མ་ཤ་མཐུག་ཅིང་འཆུས་པ། མདོག་སེར་ཞིང་ཕྱི་རྩི་འཇམ་ལ་འོད་དང་ལྡན་པ། རྒྱུ་སྲ་བས་སོས་མནན་ན་འདྲེད་པར་འགྱུར་བ་དེ། ཡིག་རིགས་འདྲ་མིན་དང་གསེར་དངུལ་མཚལ་སྣག་ཐམས་ཅད་འབྲི་བ་ལ་མཆོག་ཏུ་བཤད་དོ། །
       སྨྱུག་རྒྱུ་སྲ་བར་བཅོས་ཐབས་སུ། ཡུན་རིང་དུད་ཁར་བཞག །བ་རྐང་རྙིང་པ་རབ། མ་རྙེད་ན་རྐང་མར་རྙིང་པས་བྱུགས་ནས་བརྔོས་མ་ཐག་གི་ཡོས་ཚན་ནང་དུ་བཅུག་ནས་ལེགས་པར་འཕྱིས་ན་སྲ་མཁྲེགས་རུས་པ་ལྟ་བུར་འགྱུར་རོ། ། 
       གཞན་ཡང་འཇང་སྨྱུག་ཅེས་པའི་མདོག་ནག་པོ་སྦུ་གུ་ཅན་ནི་སུབ་ཅེས་ཏེ་དཀྱུས་ཡིག་འབྲི་བ་ལ་བདེ་བ་དང་། ལྕགས་སྨྱུག་ནི་གསུང་རབ་གཏོས་ཆེ་རྣམས་ལ་བཟང་བ་དང་། ལྷོ་སྨྱུག རོང་སྨྱུག་སྤུས་ལེགས་དག་གིས་ཀྱང་སྨྱུག་གུར་འོས་པ་སོགས་བཤད་ཀྱང་། སྔོན་བྱོན་མཁས་པས་མཛད་པའི་གསུང་བཟོའི་བསྟན་བཅོས་སུ་གསལ་བ་ཙམ་ལས་དེང་དུས་སུ་སྨྱུག་མའི་རིགས་འདི་དག་ངོས་ཟིན་མཁན་དང་། དེ་མཚུངས་ཀྱི་ལས་ཀ་ཞིབ་ཚགས་ཐུབ་མཁན་གྱི་བཟོ་བོ་ཉུང་མོད། མདོར་ན་སྨྱུ་གུའི་རྒྱུ་ནི་སྨྱུག་ཤ་མཐུག་ཅིང་སྲ་མཁྲེགས་ཅན་ཞིག་ངེས་པར་དགོས། །
        སྨྱུག་གུ་བཟོ་ཐབས་ལ།   མཐོ་གང་བས་མི་རིང་ཞིང་། མཐེབ་མཛུབ་བས་མི་ཐུང་བ། རན་པ་འཛིན་བདེར་གཞོག་རྩེ་སོར་ཕྱེད་གཉིས་གཞལ་བའི་སར་གྲིས་ཁམས་གཉིས་གཞོག་སུམ་རྫིང་ཞགས་དང་སུམ་གཅིག་མཆུ་བྱས་ཤིང་། མགྱོགས་བྲིས་འབྲི་བར་གས་ཆེན་དང་། ལེགས་པར་འབྲི་བར་གས་ཆུང་བྱས་ཏེ་རྫིང་འདྲ་ཡུར་བ་འདྲ་བ་ཞེས་སྨྱུག་རྒྱབ་ནས་བལྟས་ན་གཡས་གཡོན་ཆ་སྙོམས་པ། རྫིང་མཆུ་ཧ་ཅང་མི་སྲབ་ཅིང་བཅད་ཁ་སྟེ་མཆུ་ཅུང་ཟད་གསེག་པར་བཅད། ཚེག་བྲིས་འབྲི་ན་མཉམ་པར་བཅད། ། ཟླུམ་བྲིས་འབྲི་ན་ཉིས་ཆོད་བྱ། ། སྨྱུག་ཁ་ཆིག་ཆོད་བྱས་གྱུར་ན། ། ཡི་གེ་ལེགས་པའི་གནད་གཅིག་ཡོད། ། སྨྱུག་ཁ་ཉིས་ཆོད་བྱས་གྱུར་ན། ། སྨྱུག་ཁ་སྲ་བའི་གནད་གཅིག་ཡོད། ། གསུམ་ལྡན་ལྔ་འཛོམ་ཞེས་པའི་དོན། ། སྨྱུག་གུ་མཆུ་ལ་མཁས་གྱུར་ན། ། ཡི་གེའི་འབྲུ་ལ་མཁས་པར་བྱེད། ། ཅེས་པ་སོགས་ནི་སྨྱུག་མའི་སྨྱུ་གུ་བཟོ་ཐབས་ཁོ་ན་ཙམ་ཡིན་གྱི་དེང་དུས་ཀྱི་ལྕགས་སྨྱུག་སྣ་ཚོགས་དང་། རང་འབབ་ཆུའི་སྨྱུ་གུ་དང་། བོད་ཀྱི་ཡི་གེ་འབྲི་བ་ལའང་སྤྱོད་བདེ་བའི་མི་རིགས་ཀྱི་སྨྱུ་གུ་ལ་སོགས་སྨྱུག་གསར་རྣམ་གྲངས་མང་པོ་དག་ལ་མ་ཡིན་ཡང་། བོད་ཀྱི་ཡིག་གཟུགས་ཚད་དང་ལྡན་པ་ཞིག་འབྲི་བར་འདོད་ན་སྨྱུག་མའ་སྨྱུ་གུ་ལས་ལྷག་པ་མེད་དོ། ། 
        ༢.སྨྱུག་གྲི་བཟོ་བའི་ལག་ཤེས། 
        སྨྱུ་གུ་གཅོད་བྱེད་ཀྱི་སྨྱུག་གྲི་ནི། ལྕགས་རྒྱུ་ཧ་ཅང་བཟང་ན་རྒོད་གས་འབྱུང་ཞིང་བརྡར་དཀའ། ཧ་ཅང་ཞན་ན་ངར་མི་འཛིན་རྣོ་མི་བརྟན་པས། ལྕགས་བཟང་ངན་རན་ཞིང་གྲི་ལྕགས་མཉེན་ལ་ངར་འཛིན་པའི་ལྕགས་ཀྱི་རིགས་སམ། ཡང་ན་ཕོ་ལྕགས་མོ་ལྕགས་འདྲེས་མ་ལ་མར་དང་བུར་སྦྲང་བསྲེས་པའི་ལྕགས་ཞུན་བྱས་ནས། གྲིའི་དབྱིབས་སོགས་ཁྱད་པར་ཅན་བཟོ་དགོས་ཚུལ་ལ། གྲི་རྩེ་གཟོང་ལྟར་མཉམ་པ་ནི་སྨྱུ་གུ་བཟོ་བ་ལ་གཅེས། རྩིབ་ལྟར་སྐྱོན་མེད་པ་ནི་ཤོག་བུ་འདྲ་བ་ལ་གཅེས། རྩེ་བ་ལྟར་སོ་བྱས་པ་ནི་རྫིང་དང་ལྟག་རིས་བྱེད་པར་གཅེས། རྩིབ་མེད་བརྡར་ཤ་ཆོད་པ་རྣོ་ཁ་ལེན་ལ་གཅེས། ལྟག་མཚན་ངར་ཚད་སྙོམས་པ་རྣོ་ཡུན་རིང་བ་ལ་གཅེས། བལ་ཚིལ་གཙོ་ཁྲག་དང་ཨ་རུ་ར་སྨྱུག་གྲིའི་རང་ལ་གཅེས་པ་ཡིན། ཞེས་སོགས་དང་། རྡར་རྡོ་ནི། འཛིང་ངམ་ལྕོག་རླབས་སོགས་ཀྱི་རྡོ་སྨྱུག་གྲིའི་རྡར་ལ་གཅེས་པ་ཡིན་ཞེས་བཤད་ཀྱང་དེང་གི་རྡར་རྡོ་བཟོས་མ་ལས་ལྷག་པ་དཀོན་པ་འདྲ། བརྡར་ཐབས་ལ། ངར་ཆུང་ཐད་ཀར་བརྡར་བས་རྣོ་ཁ་མྱུར་དུ་ལེན། ངར་ཆེན་བསྐོར་ཞིང་བརྡར་བས་སོ་ཁ་འགྲུག་མི་འགྱུར། ཞེས་སོགས་གསུངས་པ་ལྟར་རོ། །
 

དཔྱད་གཏམ།

དཔྱད་གཏམ་སྤེལ་བ།
པར་དབང་ཡོད་ཚད་ངེད་ཙོང་ཆུའི་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག
Copyright © 2010 Tsongchu.coM All rights reserved. Powered by: Tibetitw.coM
E-mail:[email protected]  QQ:1239685970 QQ:32460212  MSN:[email protected]